რატომ არ ცხადდება ქვეყანაში საგანგებო მდგომარეობა კორონავირუსის შემთხვევების მატების მიუხედავად? – ამას მთავრობის ადმინისტრაციის უფროსი, ნათია მეზვრიშვილი კიდევ ერთხელ განმარტავს.
„დღემდე ისმის შეკითხვები, თუ რატომ არ ვაცხადებთ საგანგებო მდგომარეობას ქვეყანაში, როცა შემთხვევების რაოდენობა გაცილებით მეტია, ვიდრე ეს აქამდე იყო.
კიდევ ერთხელ ვიმეორებ, რომ ჩვენ თავიდან საგანგებო მდგომარეობა გამოვაცხადეთ იმისთვის, რომ სისტემა მოგვემზადებინა, ვირუსის მართვასთან დაკავშირებით შეგვეძინა მეტი ცოდნა, შეგვემცირებინა მობილობა და ამ გზით ვირუსის გავრცელება მაქსიმალურად შეგვეკავებინა
მსოფლიო პრაქტიკამაც აჩვენა, რომ ეს სტრატეგია იყო სწორი, რადგან თავიდან ავირიდეთ საკმაოდ დიდი ადამიანური დანაკარგები.
რას ვგულისხმობთ მომზადებაში, ამასთან დაკავშირებითაც ხშირად ისმის შეკითხვები:
უკეთეს მზაობაში დღეის მდგომარეობის ვგულისხმობთ იმას, სამედიცინო მარაგის დიდი რაოდენობა გვაქვს, მედპერსონალი გადამზადებულია. და სხვადასხვა მიმართულებით წინ გვაქვს გადადგმული ნაბიჯები. ამის მიუხედავად, ვხედავთ, რომ რაოდენობა მზარდია, ამიტომ განსაკუთრებული სიფრთხილე გვმართებს“, – ამბობს მეზვრიშვილი.
