ეკონომიკის მინისტრის, ნათია თურნავას განცხადებით, სახელმწიფო მაქსიმალურად ეხმარება ტურისტულ ინდუსტრიას, რომ ადაპტირება გააკეთოს.
„თითოეული მთავრობის წვერი, პრემიერ-მინისტრი, ბიზნესი ჩართულია ამ ახალ კამპანიაში, რომელსაც ჰქვია „აღმოაჩინე ის რაც შენია“ და „იმოგზაურე საქართველოსთვის“, რადგან წელს მოგზაურობა მხოლოდ ჩვენი საიმოვნებისთვის და დასვენებისთვის არ არის, ეს არის ქვეყნის დახმარებისთვის. რთული, მაგრამ ჩვენ ვცდილობთ რომ მაქსიმალურად ვიწრო, უსაფრთხო დერეფნებით გავხსნათ ჩვენი ბაზარი. „იმედის“ ეთერში ვარ და მინდა იმედიანი ფაქტები ვთქვა. 2 კვირა გავიდა რაც ჩვენ 15 უსაფრთხო ქვეყანას შორის აღმოვჩნდით ევროკავშირისთვის, ახლა მოხდა მორიგი გადახედვა ამ სიის, სადაც საქართველო დარჩა, მაგრამ სამწუხაროდ 2 ქვეყანა გამოაკლდა. ეს ორ რამეზე მეტყველებს: ერთი ის, რომ ევროპაში მაინც არ არის ერთგვაროვანი ეპიდემიოლოგიური ვითარება და მეორე, ევროკავშირი მსგავსად საქართველოსი სიფრთხილით ეკიდება. იმის გამო რომ უსაფრთხო ვართ ჩვენ დიდ იმედებს ვამყარებთ შიდა ტურიზმზე. შაბათ-კვირას ისეთი ადგილები, როგორიცაა თუნდაც კახეთი, ვერ ნახავთ თავისუფალ ადგილს. ახალი სასტუმროები გაიხსნა, როდესაც სხვა ქვეყანაში სასტუმროები იკეტება. ეს არ არის ის, რაც უცხოელ ვიზიტორს ჩაანაცვლებს, მაგრამ ეს არის ის თავისუფლება და ბიზნესის მხარდაჭერა, რაც ჩვენი უსაფრთხოების შედეგია და ამას უნდა გავუფრთხილდეთ“, – აღნიშნა ეკონომიკის მინისტრმა.
პოსტპანდემიურ პერიოდში შიდა ტურიზმის წასახალისებლად ეკონომიკისა და მდგრადი განვითარების სამინისტროს ტურიზმის ეროვნულმა ადმინისტრაციამ ახალი კამპანია წამოიწყო.
„იმოგზაურე საქართველოსთვის – აღმოაჩინე ის რაც შენია“ ამ სლოგანით ადმინისტრაცია მედიასაშუალებებით: სატელევიზიო რეპორტაჟების, ბლოგების მომზადებით, სოციალურ ქსელებით და საინფორმაციო სააგენტოებით ინფორმაციის მიწოდებით ყველა რეგიონში შიდა ტურიზმის პოპულარიზაციას ახდენს.
