„ერთაინი ნაციონალური მოძრაობის“ ოფისს იარაღიდან ესროლეს – ამის შესახებ სოციალურ ქსელში „ენმს“ პრესსამსახური სალომე სიგუა წერს და ნიკა მელიას ბანერის ფოტოს აქვეყნებს.
„ერთიანი ნაციონალური მოძრაობის“ ოფისს იარაღიდან ესროლეს. რამდენიმე გასროლის კვალი ეტყობა ნიკა მელიას აი ამ ბანერს“, – წერს სალომე სიგუა.
მომხდართან დაკავშირებით უკვე გაავრცელა განცხადება შინაგან საქმეთა სამინისტრომ.
როგორც უწყებაში აცხადებენ, შემთხვევის ადგილას ამ წუთებში შესაბამისი საგამოძიებო და საპროცესო ღონისძიებები მიმდინარეობს.
„მედიაში გავრცელებული ინფორმაციის საფუძველზე, სადაც აღნიშნული იყო, რომ თბილისში, კახეთის გზატკეცილზე მდებარე „ნაციონალური მოძრაობის“ ოფისის ფასადზე არსებული ბანერი, სავარაუდოდ, ცეცხლსასროლი იარაღიდან სროლის შედეგად დაზიანდა, შინაგან საქმეთა სამინისტრომ გამოძიება საქართველოს სისხლის სამართლის კოდექსის 187-ე და 236-ე მუხლებით დაიწყო, რაც სხვისი ნივთის დაზიანებას და ცეცხლსასროლი იარაღის მართლსაწინააღმდეგო შეძენა-შენახვა-ტარებას გულისხმობს.
აღნიშნულ ფაქტთან დაკავშირებით, შინაგან საქმეთა სამინისტროსთვის არ მოუმართავთ. გამოძიება მედიაში გასული ინფორმაციის საფუძველზე დაიწყო“, – აღნიშნულია განცხადებაში.
