„ის კრიმინალია, რადგან სასამართლომ დამნაშავედ შერაცხა „ბანკი ქართუს“ გაკოტრების საქმეზე. სხვათაშორის, ეს ყველას ავიწყდება. უბრალოდ, ეს არის ალიბი და მე ყველას შევახსენებ, რომ ამ ქვეყანაში ალიბი არ შეიძლება იყოს პოლიტიკური პარტიის ფორმალური თავმჯდომარეობა“,- ამის შესახებ პრემიერ-მინისტრობის კანდიდატმა, ირაკლი ღარიბაშვილმა, ნიკა მელიაზე საუბრისას განაცხადა.
როგორც ღარიბაშვილი ამბობს, „ნაციონალურ მოძრაობას“ ერთადერთი ლიდერი ჰყავს და ეს არის მიხეილ სააკაშვილი.
„კარგად მოგვეხსენება, როგორი თავმჯდომარეა მელია „ნაცმოძრაობის“. „ნაცმოძრაობის“ თავმჯდომარე არის ბატონი სააკაშვილი, სხვა ლიდერი არ არსებობს „ნაცმოძრაობაში“. მელია, მანამდე ვაშაძე იყვნენ და არიან ყოველთვის დროებითი, ფორმალური სახეები. მელიასთან მიმართებაში, ნახეთ, როგორი ჭკვიანური სვლა გააკეთეს მათი გათვლით“, – განაცხადა ღარიბაშვილმა.
ბატონი მელია, არის გასამართლებული, მას მიესაჯა კონკრეტული სასჯელი „ბანკი ქართუს“ საქმეზე. ამაშიც გამოჩნდა ჩვენი ჰუმანური პოლიტიკა და ყოფილი თავმჯდომარის ივანიშვილის დამოკიდებულება საკითხებისადმი. მას პირობითი სასჯელი მიესაჯა, თუ არ ვცდები და ჯარიმა, რომელიც მან გადაიხადა. ანუ, ის არის ჩვეულებრივი კრიმინალი. ეს კრიმინალი გამოაცხადეს ახლა პარტიის თავმჯდომარედ ორი თუ სამი თვის წინ და გვეუბნებიან, რომ მან იმ მძიმე დანაშაულზე, რომელიც ჩაიდინა სავარაუდოდ, რომელსაც იძიებს შსს და პროკურატურა, ვგულისხმობ პარლამენტზე შტურმის ორგანიზების და ხელისუფლების ძალადობრივი გზით დამხობის მცდელობას, გვეუბნებიან, რომ თურმე არ უნდა შევეხოთ ბატონ მელიას. მე ვეკითხები ყველას, რომელ ქვეყანაში გინახავთ, ასეთი ტიპის, მსგავსი დანაშაულებისთვის, ადამიანებს ინდულგენციებს აძლევდნენ და როდის ყოფილა, რომ პოლიტიკური პარტია გამხდარა ასეთი კრიმინალების თავშესაფარი“, – განაცხადა ღარიბაშვილმა.
