„მელიამ უნდა დატოვოს საპატიმრო ყოველგვარი გაუგებარი გირაოს გარეშე. უნდა დატოვოს ისე, როგორც მას სურს, იმიტომ რომ ის უკანონოდ იმყოფება საპატიმროში“,- ამის შესახებ საქართველოს მესამე პრეზიდენტი, მიხეილ სააკაშვილი აცხადებს.
მიხეილ სააკაშვილი „ნაციონალურ მოძრაობას“ მოუწოდებს, მელიას გათავისუფლების შემდეგ, პარლამენტში შევიდეს.
„ნიკა მელია უნდა გამოვიდეს საპატიმროდან, ისევე როგორც გიორგი რურუა, ისევე როგორც უნდა შეწყდეს პოლიტმპატიმრების ნაწილის მიმართ პოლიტიკური დევნა, ეს უნდა მოხდეს უპირობოდ. მელიამ უნდა დატოვოს საპატიმრო ყოველგვარი გაუგებარი გირაოს გარეშე. უნდა დატოვოს ისე, როგორც მას სურს, იმიტომ რომ ის უკანონოდ იმყოფება საპატიმროში.
მას შემდეგ, რაც იგი დატოვებს ამ პირობებით საპატიმროს, მე მინდა მოვუწოდო „ნაციონალურ მოძრაობას“, ხელი მოვაწეროთ ამ შეთანხმებას იმიტომ, რომ ამ შეთანხმებაში არის მთავარი მეორე პუნქტი. შემოდგომაზე პრაქტიკულად დაინიშნა „ქართული ოცნების“ რეფერენდუმი. ეს არის უკვე დაშვება რიგგარეშე არჩევნების. ამისათვის ჩვენ უნდა გამოვიყენოთ ყველაფერი, უნდა შევიდეთ იმ პარლამენტში, რომელიც მიგვაჩნია უკანონოდ, გამოვიყენოთ ეს ინსტრუმენტიც და ყველა სხვა ბრძოლის ფორმა დემოკრატიის ფარგლებში. ჩვენ უნდა ვიყოთ ძალიან მობილიზებულები“,- განაცხადა მიხეილ სააკაშვილმა.
