“ევროპული “საქართველოს” ერთ-ერთი ლიდერი, სერგი კაპანაძე საქართველოში ევროკავშირის წარმომადგენლობის განცხადებას ეხმაურება და აცხადებს, რომ მიუხედავად მეგობრული დამოკიდებულებისა, მათ რჩევას ოპოზიცია ვერ გაითვალისწინებს და პარლამენტში ვერ შევა, რადგან პარლამენტი არალეგიტიმურია, ხოლო სხვა ინსტიტუტები არ მუშაობს.
“გვესმის მათი წუხილი იმ კრიზისის გამო, რაც ქვეყანაშია შექმნილი და ჩვენ, მთელი ეს პერიოდი მათ ვაწვდით ყველა ინფორმაციას, რატომ არ ხდება ინსტიტუტების ისე გამოყენება, როგორც მათ უნდათ. იმ მარტივი მიზეზის გამო, რომ ჩვენ ამ ინსტიტუტებს ვიყენებთ, მაგრამ რეაქცია ინსტიტუტების მხრიდან არის სრული უგულებელყოფა.
არცერთი საჩივარი არ იქნა დაკმაყოფილებული, პრაქტიკულად არცერთი მოთხოვნა გადათვლასა და გაუქმებასთან დაკავშირებით არ იქნა დაკმაყოფილებული. აქედან გამომდინარე, ამ რეალობაში, როდესაც სრულიად ცალსახაა, რომ პარლამენტი არ არის ლეგიტიმური, ოპოზიციის მხრიდან, მათი კონკრეტული მეგობრული მოსაზრების გათვალისწინება არ მოხდება, ანუ ჩვენ არ ვაპირებთ, რომ პარლამენტში შევიდეთ. პატივს ვცემთ მათ მოსაზრებებს, მაგრამ ასევე გვესმის, რომ ამ ქვეყნის მომავალის წინაშე პასუხისმგებლობა არის ჩვენზე”. – თქვა სერგი კაპანაძე.
ცნობისთვის, 22 ნოემბერს საქართველოში ევროკავშირის წარმომადგენლობამ ოპოზიციას პარლამენტში შესვლისკენ მოუწოდა.
“მოვუწოდებთ პარლამენტის წევრებს, გამოიყენონ მინიჭებული მანდატები”, – ნათქვამია eu-ს წარმომადგენლობის განცხადებში.
