საპასუხო ნაბიჯი, რაც ნიკანორ მელიას და მისი თანამოაზრეების მხრიდან ვიხილეთ, ააშკარავებს ოპოზიციის რიგი მესვეურების არაკონსტრუქციულ და არაკეთილსინდისიერ დამოკიდებულებას მიმდინარე პროცესებთან მიმართებაში, – ამის შესახებ ადამიანის უფლებათა დაცვის კომიტეტის თავმჯდომარემ, მიხეილ სარჯველაძემ საქართველოს პირველი არხის გადაცემაში „დღის თემა“ განაცხადა.
„აშკარად გამოჩნდა, რომ რეალურად, მათი სურვილია, თავი მსხვერპლის მდგომარეობაში წარმოაჩინონ და ასეთი ილუზია შექმნან. საზოგადოება ამას არც ერთ შემთხვევაში არ მიიღებს, როგორც სიმართლეს, ვინაიდან მართლაც ძალიან მკაფიოდ ჩანს, სიმართლე რა არის. სიმართლე კი ის არის, რომ ირგებენ რაღაც როლებს და ნიღბებს, რაც საზოგადოებისთვის არადამაჯერებელია. თვალსაჩინოა, რომ ამ შემთხვევაში საქმე პოლიტიკურ დევნასთან კი არ გვაქვს, არამედ თავად ოპოზიციის მხრიდან სპექტაკლების იმგვარად გათამაშებაში, სადაც ვინმე შეძლებს, პოლიტიკური დევნილის როლი მოირგოს“, – განაცხადა სარჯველაძემ.
