ორივე მხარის მოქმედებები ცივილური იყო. ოპოზიციას ძიძგილაობა არ დაუწყია, – ასე აფასებს ექსპერტი გია ხუხაშვილი „პრაიმტაიმნიუსთან“ დღის მთავარ თემას, ნიკა მელიას დაკავების საკითხს.
„საქმე პოლიტიკურია. მელია დამნაშავეა, არ არის დამნაშავე, სამართლებრივ თემებში არ შევალ, პრობლემა იმაშია, რომ ის ამ საკითხთან დაკავშირებით, გასამართლებული არ არის. ევროპული სტანდარტების მიხედვით, პოლიტიკური ფიგურები, ლიდერები წინასწარ პატიმრობაში არ ჰყავთ. 2 წელი გავიდა, სასამართლომ არსებითად რატომ არ განიხილა 20 ივნისის თემები? ამ კითხვაშივე ჩანს, რომ საქმე არის პოლიტიკური. მელიასთვის განაჩენი რომ გამოეტანათ, ამდენი კითხვა არ იქნებოდა. შეიძლება, თეორიულად არის შანსი, რომ სასამართლომ ის გაამართლოს.
მელიას დაპატიმრება პოლიტიკური უგუნურებაა, ერთი მხრივ, ხელისუფლებას ეშინია შინაგანი უგუნურების დემონსტრირების, ღარიბაშვილი თვალებს აბრიალებს და ფეხებს აბაკუნებს, მაგრამ ეს უფრო სისუსტის გამოვლინებაა და არა ძალის დემონსტრირება.
კმაყოფილი ვარ დღევანდელი პროცესები ტექნიკურად როგორც განვითარდა. რადგან ორივე მხარის მოქმედებები ცივილური იყო. ოპოზიციას ძიძგილაობა არ დაუწყია. 1 კაცის დასაჭერად 5 000 პოლიციელი რომ მივა, სირცხვილია. ძალიან მაღალი ხარისხის დეგრადაციაა ამით რომ ამაყობდეს კაცი, თითქოს პოლიციას სხვა საქმე არ აქვს. მე შემიძლია ორივე მხარე შევაქო, მაგრამ იქ გმირობა არ ჩაუდენიათ. საგმირო იქნებოდა, ცხინვალთან რომ იყვნენ ახლა, თბილისში მარაზმს კი არ ატარებდეს 5 000 კაცი ადამიანის დასაჭერად, რომელიც ჯერ გასამართლებულიც არ არის“, – განაცხადა ხუხაშვილმა.
გია ხუხაშვილი საერთაშორისო პარტნიორების შეფასებებსაც ეხმაურება და ამბობს, რომ კრიტიკა უფრო გაძლიერდება.
„საერთაშორისო პარტნიორების კრიტიკა გაძლიერდება. ეს არის ეტაპობრივი პროცესი, ჯერ იქნება გაფრთხილებითი ხასიათის მოქმედებები და შემდეგ სიტუაცია დამძიმდება.
სიტუაცია ყოველდღიურად მძიმდება, გამოსავალზე საუბარს აზრი არ აქვს. მელიას დაჭერამდე თეორიული შანსი კიდევ იყო, რომ მხარეებს რაღაცაზე ესაუბრათ, ეს ფანჯარა უკვე დაიხურა. მოლაპარაკებების სივრცე აღარ არის. მოლაპარაკებების ერთ-ერთი თემა, რაზეც შეიძლებოდა შეთანხმებულიყვნენ, ეს იყო დეკლარირებული პატიმრების გამოშვება, ამათმა გამოშვება კი არა, ადგნენ და მელია დაიჭირეს. ხელისუფლება გახდა აბსოლუტურად სტერილური, პარტნიორი აღარც ქვეყნის შიგნით და აღარც ქვეყნის გარეთ ჰყავს. ამ ბოლო დროს, მეტ-ნაკლებად დაალაგეს სიტუაცია უცხოეთთან, ყველაფერი კი ერთ დღეში ჩარეცხეს.
მელია რაში სჭირდებოდათ, ერთადერთი, ალბათ იმაში, რომ მიშასთან ძალიან სიამტკბილობა ჰქონდათ, დალაგებული მატრიცა, სიმბიოზი შექმნილი და მელიამ აანერვიულა, ეს სიყვარული დაურღვია. ერთმანეთს აგინებდნენ, ლანძღავდნენ, ერთმანეთის დემონიზაციას ახდენდნენ, ტკბილად და გემრიელად ცხოვრობდნენ. ეს ყველაფერი ნიკამ არია“, – განაცხადა გია ხუხაშვილმა.
დღეს დილით, 23 თებერვალს, სამართალდამცველებმა ნიკა მელია ოფისში დააკავეს.
ნაციონალური მოძრაობის” ოფისთან სპეციალური დანიშნულების რაზმმა ცრემლსადენი გაზი გაუშვა.
ოფისთან მობილიზებული იყო სასწრაფო დახმარების ეკიპაჟები. ოფისის მიმდებარე ტერიტორიაზე ნიკა მელიას მხარდამჭერებსა და სამართალდამცველებს შორის მდგომარეობა რამდენჯერმე დაიძაბა.
მანამდე, „ნაციონალური მოძრაობის“ ოფისთან სამართალდამცველებმა რამდენიმე ადამიანი დააკავეს.
სამართალდამცველები „ნაციონალური მოძრაობის“ოფისში დღეს დილით შევიდნენ.
ცნობისთვის, ნიკა მელიას თბილისის საქალაქო სასამართლომ აღკვეთის ღონისძიებად პატიმრობა 17 თებერვალს შეუფარდა.
