მორიგი აქცია გამართა დღეს ე. წ. „ოცნების ქალაქის“ მოსახლეობამ აჭარის ფინანსთა და ეკონომიკის სამინისტროსთან. აქციის მონაწილეები კვლავ ინდივიდუალური ხელშეკრულებების გაფორმებასა და ბინების გადასაცემად საჭირო კრიტერიუმების დადგენას ითხოვენ ხელისუფლებისგან, რაც სამომავლოდ, მათი განცხადებით, საცხოვრებელი ფართების მიღების მყარი გარანტია იქნება.

როგორც აქციის მონაწილეები აცხადებენ, აქვთ საფუძვლიანი ეჭვი, რომ მხოლოდ 582 ოჯახი დაკმაყოფილდება ბინებით და მშენებლობა აღარ გაგრძელდება.

აქციის ერთ-ერთმა მონაწილემ კვერცხები ისროლა სამინისტროს შენობის მიმართულებით.

„სანამ მოსახლეობას არ დააკმაყოფილებთ, ვერავინ ვერ შევა აშენებულ ბინებში. გამოვიდეს მინისტრი და დაგველაპარაკოს. გვაჩვენოს სიები, ვის აძლევენ ბინებს. თუ არა, შევალთ ძალით შენობაში. არ დავიხევთ უკან და ჩვენს 9 წლიან ნაწვალებს არ დავთმობთ. დედები ვართჩვენ და შვულებს ქუჩაში ვერ დავტოვებთ“. – აცხადებს მარინა ბერიძე.

აქციის მონაწილეებმა 5 წუთი მიცეს ვადა, რომ გამოვიდეს მინისტრი და შეხვდეს. წინააღმდეგ შემთხვევაში კი ძალით შეიჭრებიან.

აქციის მონაწილეებმა სამინისტროს შენობაში შეჭრა სცადეს, რისი საშუალებაც მათ პოლიციამ არ ნისცა, რასაც სიტყვიერი დაპირისპირება მოყვა.

ადგილზე მობილიზებული არიან სამართალდამცავები.

შეგახსენებთ, ე. წ. ოცნების ქალაქში სულ 1700 ოჯახი ცხოვრობს. ამ ეტაპზე სამშენებლო ტერიტორიაზე სამი 12 სართულიანი საცხოვრებელი კორპუსი შენდება.

აჭარის მთავრობის ინფორმაციით, სპეციალური სამთავრობო კომისია “ოცნების ქალაქში” მოსახლეობისთვის ბინების გადასაცემად საჭირო კრიტერიუმებზე მუშაობს.

ავტორი: ნაირა ქობულაძე