დაუდგენელმა პირებმა, სოფელ დუისში ქავთარაშვილების საცხოვრებელი სახლი, ცეცხლსასროლი იარაღით დაცხრილეს.

ოჯახში რამდენიმე წევრი იმყოფებოდა, თუმცა, ყველა მათგანი უვნებელი გადარჩა.

ქავთარაშვილების სახლში პოლიცია იყო მობილიზებული და საგამოძიებო სამუშაოები მიმდინარეობდა.

პანკისის ხეობის სოფელ დუისში, მურად ქავთარაშვილის სახლის დაცხრილვის ფაქტზე, გამოძიება ორი მუხლით დაიწყო.

სამართალდამცავები საქმეს სისხლის სამართლის კოდექსის 151-ე და 236- ე მუხლებით გამოიძიებენ, რაც მუქარასა და ცეცხლსასროლი იარაღის მართლსაწინააღმდეგო შეძენა- შენახვა ტარებას გულისხმობს.

პოლიციამ პანკისის ხეობაში უკვე გამოკითხა რამდენიმე პირი, მათ შორის ერთ- ერთი, საკობიანოში მომხდარი დაპირისპირების დროს გარდაცვლილი, ვისო მუთოშვილის ძმაა.

შეგახსენებთ, მურად ქავთარაშვილი 2019 წელს სოფელ საკობიანოსთან, გვარებს შორის სისხლიანი შეტაკების საქმესთან დაკავშირებული პირია.

მაშინდელ დაპირისპირებას 37 წლის ვისო მუთოშვილის სიცოცხლე ემსხვერპლა. თავად ქავთარაშვილი კი, ფეხში დაიჭრა.

საქმეზე ორი პირია დაკავებული და სასამართლო პროცესები დღემდე მიმდინარეობს.

დაპირისპირებაში მონაწილე, ქავთარაშვილებისა და მუთოშვილების გვარების, ქისტური ადათის მიხედვით შერიგებას, ხეობაში ჩასული მუსლიმური სამყაროს ავტორიტეტული წარმომადგენლები, დღემდე უშედეგოდ ცდილობენ.

უკავშირდება თუ არა მომხდარი ფაქტი შურისძიებას, ჯერჯერობით გარკვეული არ არის.

ავტორი: ხათუნა გულიაშვილი