თბილისის საქალაქო სასამართლომ გაიზიარა ცესკოს თავმჯდომარის, თამარ ჟვანიას მიერ შედგენილი ადმინისტრაციულ სამართალდარღვევათა ოქმის შინაარსი და „პატრიოტთა ალიანსი“ ანტითურქული საარჩევნო რეკლამის გამო 2 000 ლარით დააჯარიმა.

სასამართლომ გადაწყვეტილება რამდენიმე დღის წინ გამოაცხადა.

საჩივრით ცესკოს „სამართლიანმა არჩევნებმა“ მიმართა. ორგანიზაციის მტკიცებით, პარტიის ოფიციალურ გვერდზე განთავსებული 9 რეკლამიდან 6 ანტითურქული იყო, რაც მიზნად ისახავდა თურქეთის მიმართ მტრული განწყობებისა და რელიგიური და ეთნიკური შუღლის გაღვივებას. ვიდეოებს თან ახლდა წარწერა: „დაიცავი შენი წილი საქართველო. შენ ეს შეგიძლია. ვიმოქმედოთ, ნუ დავუთმობთ აჭარას თურქეთს“.

პარტიაში ამბობენ, რომ Facebook-გვერდი „თარხან-მოურავი, ირმა ინაშვილი, საქართველოს პატრიოტთა ალიანსი“ მათ არ ეკუთვნოდათ და იყო მხარდამჭერების შექმნილი.

პარტიის განმარტებით, ეს არ იყო პოლიტიკური რეკლამა და იყო ისტორიული ფაქტების ასახვა.