„ფაქტი ერთია – რაც დღეს ვიხილეთ, სამწუხაროდ, პირველ რიგში, მიზანმიმართულად იყო დაორგანიზებული, რათა დღეს ეს სხდომა არ შემდგარიყო. ძალიან სამწუხაროა. შესვენების დროს, მე მოვისმინე განცხადებებიც, სადაც პირდაპირ და ღიად აცხადებენ, რომ მათი,, პოლიტიკურ ჯგუფების მიზანი არ იყო დღეს სხდომის ჩატარება იმისთვის, რომ დაესვათ კითხვები და მოესმინათ პასუხები“, – განაცხადა პარლამენტის თავმჯდომარემ მას შემდეგ, რაც ოპოზიციის ნაწილმა პარლამენტში შს მინისტრის მოსმენა ჩაშალა.
„სამწუხაროა, რომ როდესაც იყო მოთხოვნა, რომ დავბრუნებულიყავით ჩვეულებრივ რეჟიმში, ეს არ განხორციელდა და პროტესტი დღესაც გრძელდება იმ ადგილიდან, საიდანაც ერთადერთი ვალდებულება არის გაშუქდეს სესიის სხდომა, რაც ნამდვილად არ წარმოადგენს არა მხოლოდ კონსტრუქციულ ფარგლებში იმ კითხვების და პასუხების მოსმენას, რომელიც საზოგადოებას აინტერესებს, დაყენებული იქნა საკითხი უმრავლესობის მხრიდან, რომ ასეთ რეჟიმში განხილვის გაგრძელება ნამდვილად არ ემსახურება იმ მიზანს, რისთვისაც შევიკრიბეთ და დაინიშნა რიგგარეშე სხდომა, ამიტომ, დღევანდელ სხდომას ვაცხადებ დახურულად, და საკითხზე ვიმსჯელებთ სხვა რიგგარეშე სხდომაზე, რა საკითხები გვექნება განსახილველი – უკვე ბიუროს ფორმატში“, – განაცხადა კახა კუჭავამ.
საკანონმდებლო ორგანოში, პარლამენტის რიგგარეშე სესიის პლენარული სხდომა, რომელზეც შინაგან საქმეთა მინისტრისთვის, ვახტანგ გომელაურისთვის უნდა მოესმინათ, ჩაიშალა.
