აშშ-ის ჯანდაცვის ოფიციალური პირები ვარაუდობენ, რომ კოვიდის „ომიკრონი“ ვარიანტი ნაკლებად საშიში შეიძლება იყოს, ვიდრე „დელტა“ ვარიანტი.
აშშ-ის ალერგიისა და ინფექციური დაავადებების ცენტრის დირექტორმა, ენტონი ფაუჩიმ განაცხადა, რომ მეცნიერებს მეტი ინფორმაცია სჭირდებათ „ომიკრონი“ ვარიანტით გამოწვეული დაავადების სიმძიმის შესახებ დასკვნების გასაკეთებლად.
სამხრეთ აფრიკიდან მიღებული მონაცემები ცხადყოფს, რომ „ომიკრონი“ ვარიანტის გავრცელების შემდეგ, ჰოსპიტალიზაციის მაჩვენებელი საგანგაშოდ არ გაზრდილა.
„ჯერჯერობით, არ ჩანს, რომ ამ ვარიანტს სიმძიმის დიდი ხარისხი აქვს. თუმცა, ნამდვილად ფრთხილად უნდა ვიყოთ, სანამ რაიმე გადაწყვეტილებას მივიღებთ იმის თაობაზე, რომ ის ნაკლებად მძიმეა ან ნამდვილად არ იწვევს მძიმე დაავადებას, „დელტა“ ვარიანტთან შედარებით“, – აღნიშნა ენტონი ფაუჩიმ.
