ნავთობმომპოვებელი კომპანია „ფრონტერას“ დედოფლისწყაროს საბადოს თანამშრომლები აქციას მართავენ. სახელფასო დავალიანების გასტუმრების მოთხოვნით, ისინი კომპანიასთან შეიკრიბნენ.
აქციის მონაწილეების ინფორმაციით, მათი ხელფასები დღემდე გასასტუმრებელია, ხოლო სასამართლო დავა, რომლითაც ისინი დავალიანების ანაზღაურებას ითხოვენ, ჭიანურდება.
„ჩვენი ხელფასი დღემდე არ გაუსტუმრებიათ. ნედლეულის გატანის შესაძლებლობა მივეცით, მაგრამ, როგორც ჩანს, მაინც არ აპირებენ დავალიანება დაგვიფარონ. სასამართლოსაც გადაწყვეტილება არ გამოაქვს და გამოუვალ მდგომარეობაში ვართ“,- განაცხადა აქციის ერთ- ერთმა მონაწილემ.
კომპანიის ხელმძღვანელებიდან, თანამშრომლებს, არავინ გამოხმაურებია.
„ფრონტერას“ თერთმეტთვიანი დავალიანება თანამშრომლების მიმართ, მილიონ ლარს აღწევს. საბადოს თანამშრომლები აქციებს, წელიწადზე მეტია ატარებენ. მათ სარჩელით სასამართლოსაც მიმართეს.
„ფრონტერას“ წინააღმდეგ საარბიტრაჟო დავას აწარმოებდა სახელმწიფოც. დავა, ჰააგის საარბიტრაჟო სასამართლოში, საქართველოს გამარჯვებით დასრულდა.
ავტორი: ხათუნა გულიაშვილი
