საზოგადოებრივი მაუწყებლის სამეურვეო საბჭოს სხდომა დღეს გაიმართა. საბჭოს წევრებმა არხის გენერალური დირექტორის ვასილ მაღლაფერიძის გადაწყვეტილება განიხილეს.
როგორც სხდომის დასრულების შემდეგ ჟურნალისტებთან საუბრისას სამეურვეო საბჭოს თავმჯდომარე ირინა ფუტკარაძემ განაცხადა, პირველი არხის გენერალური დირექტორის მოვალეობას დროებით არხის გენერალური დირექტორის პირველი მოადგილე თინათინ ბერძენიშვილი შეასრულებს.
„ყოველთვის იყო საუბარი იმაზე, რომ ვასილ მაღლაფერიძე იყო ,,ქართულ ოცნებასთან” და სხვადასხვა პირებთან, ეს ყოველთვის სდევდა ამ პიროვნებას. ამ გადაწყვეტილების საფუძველიც ეს იყო და მისი განცხადებიდანაც ჩანს, რომ არ სურდა ამას შეექმნა გარკვეული პრობლემები არხის სამაუწყებლო პოლიტიკასთან დაკავშირებით. საზოგადოებრივი მაუწყებლის სამეურვეო საბჭო საკმაოდ სიღრმისეულად იმუშავებს და დააკვირდება წინასაარჩევნო, საარჩევნო და შემდგომ პერიოდს. გავაკეთებთ შეფასებას რამდენად მიკერძოებული იყო ან არ იყო ვასილ მაღლაფერიძე“, – განაცხადა ირინა ფუტკარაძემ.
სამეურვეო საბჭოს თავმჯდომარე მედიაში გავრცელებულ ერთ-ერთ სავარაუდო ვერსიასაც გამოეხმაურა, რომლის მიხედვითაც, ვასილ მაღლაფერიძის თანამდებობიდან წასვლა ტელევიზიაში აუდიტის სამსახურის არაგეგმურ შემოსვლას უკავშირდება.
„ჩვენ აუდიტი მარტის თვეში გვყავდა შემოყვანილი, არანაირ არაგეგმურ შემოწმებაზე ამ ეტაპზე აუდიტის სამსახური შემოსული არ არის. მაღლაფერიძის გადადგომას არ უკავრიდება, მარტის თვის დასკვნით ყველაფერი არის ძალიან კარგად, თანხმები დახარჯულია პოზიტიურად და მიზნობრივად. ასევე, წლების განმავლობაში მიმდინარეობს სამართლებრივი დავა მაუწყებლის თანამშრომლებსა და მაუწყებელს შორის, ჩვენი ყოფილი 17 თანამშრომელი დაობს შესაბამის ინსტანციაში და დანამდვილებით შემიძლია გითხრათ, რომ ესეც არ არის გადადგომის მიზეზი“, – განაცხადა ირინა ფუტკარაძემ.
ცნობისთვის, საქართველოს პირველი არხის გენერალურმა დირექტორმა, ვასილ მაღლაფერიძემ თანამდებობა დღეს დატოვა.
