რუსი ჟურნალისტი ვლადიმერ პოზნერი, რომლის საქართველოში ვიზიტს ხმაური მოჰყვა, ინსტაგრამზე პოსტს აქვეყნებს. ის მოკლედ ეხმაურება საკუთარი დაბადების დღის წვეულების ჩაშლას და საქართველოში სამოქალაქო აქტივისტების პროტესტს.

„მსურს განვმარტო თბილისში მომხდართან დაკავშირებით რატომ არ მივეცი არავის ინტერვიუ და გადაცემებში მონაწილეობაზე უარი რატომ ვთქვი. ახსნა მარტივია, და როგორც მე მეჩვენება, ცხადია, რომ ადამიანებისთვის, ვინც ეს ალიაქოთი მოაწყო, ყურადღების მიქცევად არ ღირს. ბევრი პატივია. ამიტომაც ვარ ჩუმად და ვიქნები კიდეც“,- წერს პოზნერი.

ცნობისთვის, ვლადიმერ პოზნერი საქართველოში 31 მარტს ჩამოვიდა. მის ვიზიტს საქართველოში სამოქალაქო აქტივისტების პროტესტი მოჰყვა, რომლებსაც მოგვიანებით, პოლიტიკოსებიც შეუერთდნენ.

მოვლენები ე.წ. კომენდანტის საათის დროს განვითარდა, ამიტომ შრომის ინსპექციამ სასტუმრო „ვინოტელი“, სადაც ვლადიმერ პოზნერი და მისი სტუმრები იმყოფებოდნენ, 10 000 ლარით დააჯარიმა.

პოლიციამ რუსეთიდან ჩამოსული 32 მოქალაქე, მათ შორის ვლადიმერ პოზნერი იზოლაციისა და კარანტინის წესის დარღვევის ფაქტზე დააჯარიმა. რუსმა ჟურნალისტმა საქართველო 1-ელ აპრილს, დილით დატოვა.

გაირკვა, რომ რუს სტუმარს საქართველოში უმასპინძლა რუსეთში მოღვაწე მომღერლის, მირანდა მირიანაშვილის ოჯახმა.

მირიანაშვილი პოზნერის თბილისში ჩამოსვლასა და მის მიმართ გამოთქმულ კრიტიკას სოციალურ ქსელში გამოეხმარა.