პარტია „მოქალაქეების“ ლიდერი ალეკო ელისაშვილი ყოფილი-პრემიერ მინისტრის გიორგი გახარიას სიტყვებს გამოეხმაურა, რომ ქვეყნის ერთ-ერთი მთავარი პრობლემა ნეპოტიზმი და კორუფციაა.
„წლების განმავლობაში ბიზნესობმუდსმენი რომ იყავი, ეკონომიკის მინისტრი რომ იყავი, პრემიერ-მინისტრი რომ იყავი და ახლა ამბობ ქვეყნის პრობლემა კორუფცია და ნეპოტიზმიაო – ძალიან უხერხულია! კი არადა სამარცხვინოა! ესე იგი ეს წლები ან თავად მონაწილეობდი კორუფციაში და ნეპოტიზმში ან თვალებს ხუჭავდი ერთზეც და მეორეზეც. თუ მისი გადადგომის მერე აღმოცენდა ეგ მანკიერებები?“, – წერს ალეკო ელისაშვილი სოციალურ ქსელში.
ცნობისთვის, დღეს, საქართველოს ყოფილი პრემიერ-მინისტრის, გიორგი გახარიას პარტიის – „საქართველოსთვის“ სადამფუძნებლო კონფერენცია გაიმართა.
პარტიის სადამფუძნებლო კონფერენციაზე, პარტიის თავმჯდომარედ გიორგი გახარია აირჩიეს.
ასევე, გიორგი გახარიამ პოლიტსაბჭოს წევრები წარადგინა.
