„შესაძლოა, პროკურატურას ერჩივნოს, რომ ეს საქმე გაიწელოს დიდხანს, იყოს თაროზე შემოდებული და არ დადგეს მათთვის მიუღებელი შედეგი, რაც არის გამამართლებელი განაჩენი“,- ამის შესახებ ივერი მელაშვილის ადოკატმა, ედუარდ მარიკაშვილმა განაცხადა.
მისი თქმით, არც გუშინ და არც მანამდე პატიმრობაში დატოვების საფუძველი არ არსებობდა.
„კანონმდებლობა უცნაურად არის მოწესრიგებული და გარკვეულწილად არ გვაძლევს აღკვეთის ღონისძიების გირაოთი გასაჩივრების შესაძლებლობას, თუმცა ეს ჩანაწერები კონსტიტუციას ეწინააღმდეგება და ჩვენ გავასაჩივრებთ აუცილებლად. ჩვენ პროცესზე დავაფიქსირეთ, რომ 30 000 და 20 000 ივერი მელაშვილისთვის არის გარკვეულწილად მძიმე ტვირთი. ეს არის მძიმე ტვირთი საქართველოს ნებისმიერი მოქალაქისთვის დღეის მდგომარეობით, მათ შორის პანდემიიდან გამომდინარე. იმ მოცემულობაში, როცა დანაშაული და რაიმე საფრთხე არ არსებობს, მინიმალური აღკვეთის ღონისძიების სახით გირაოს მოცულობის გამოყენებასაც ექნებოდა გარკვეული ეფექტი. იმ მოცემულობით, რითაც პროკურატურა წარდგა სასამართლოს წინაშე და უნდა ამტკიცოს, რომ ეს საქმე გადაეცეს საქმის არსებით განხილვას, არის ძალიან სუსტი პოზიციები.
საქმეში ფაქტობრივად ერთ მტკიცებულებასაც ვერ ნახავთ. თვითონ რაც მოიპოვეს, მათ შორის ფარული ჩანაწერები და რაც წესით უნდა იყოს ერთ-ერთი ყველაზე ვალიდული მტკიცებულებები, როდესაც ადამიანები კერძოდ ლაპარაკობენ და ჰგონიათ, რომ მათ არ უსმენენ და იქ უნდა რაღაც თქვან რეალურად, ის მტკიცებულებებიც ჩვენი სასარგებლოა. უფრო მეტიც, მათი დამონტაჟებული ვერსიებიც ჩვენი სასარგებლოა, როდესაც პროკურატურამ რეალობა დაამახინჯა მონტაჟით“, – განაცხადა ადვოკატმა.
