ჩეჩნეთის ლიდერი, რამზან კადიროვი უარყოფს, რომ ქართველი ჟურნალისტის ლიკვიდაცია შეუკვეთა და აღნიშნავს, რომ მისგან მიღებულ დავალებები ყოველთვის სრულდება.

ამის არ სჯერათ საქართველოში – პოლიტოლოგი ნიკა ჩიტაძე „პრაიმტაიმთან“ გიორგი გაბუნიას შესაძლო ლიკვიდაციასა და კადიროვის გეგმებზე რამდენიმე ვერსიას აჟღერებს.

„რამზან კადიროვზე საფუძვლიანი ეჭვი არსებობს, რომ მან შეუკვეთა ბორის ნემცოვის და ანა პოლიტკოვსკაიას მკვლელობა, არ არის გამორიცხული, რომ მას გიორგი გაბუნიას ლიკვიდაციის მცდელობაც ჰქონოდა. თუმცა, ამის ზუსტი მტკიცებულება არ გვაქვს. ერთი მხრივ, ის ასრულებს პუტინის დავალებას და გამოდის, რომ პუტინი ხელს იბანს და გახმაურებული მკვლელობები შესაძლოა, მიეწეროს კადიროვს.

გიორგი გაბუნიას მონოლოგის შემდეგ, გახსოვთ პუტინმა როგორი ტაქტიკაც აირჩია – თავად მუქარები არ გააჟღერა, სრული იგნორირება გაუკეთა. განაცხადა, რომ საქართველოს წინააღმდეგ სანქციებს არ შემოიღებს, რადგან ამ ჟურნალისტს არავინ იცნობდა და ახლა მისი ლანძღვა-გინებით სახელი გაითქვა. სამაგიეროდ, საქართველოს ისტორია დაამახინჯა აფხაზეთზე და ცხინვალზე საუბრის დროს“, – ამბობს ნიკა ჩიტაძე.

დავაკავეთ შეკვეთით მკვლელობის მომზადების ფაქტზე! – სუსის პირველი კომენტარი გაბუნიას საქმეზე

პოლიტოლოგის განმარტებით, არსებობს რამდენიმე ვერსია. ერთ-ერთის თანახმად, შესაძლოა, ჩეჩნეთის ლიდერი რუსეთის პრეზიდენტს გონივრულად იყენებდეს და ჟურნალისტის შესაძლო ლიკვიდაცია არა პუტინის დავალებით, არამედ საკუთარი ინიციატივით გადაწყვიტა.

„კადიროვმა მოაწყო სამხედრო აღლუმი, ჩეჩნეთის ემბლემით გამოიყვანა ჯარი, ამ შემთხვევაში, თავდაცვა და საგარეო პოლიტიკა წარმოადგენს ცენტრალური ხელისუფლების კონპეტენციას, თან შარიათის კანონები მოქმედებს ჩეჩნეთში, რეალურად პუტინი კადიროვის ქმედებებზე თვალს ხუჭავს. კადიროვიც დამოუკიდებელ თამაშს თამაშობს, შესაძლოა, გაბუნიას ლიკვიდაციის გადაწყვეტილებაც დამოუკიდებლად მიიღო,ის მეტ-ნაკლებად დამოუკიდებელი ლიდერია.

ეს ვერსია დასაშვებია, რადგან ჩეჩნეთის ბიუჯეტის 95% ფორმირდება ფედერალური ბიუჯეტიდან გადმორიცხული თანხებით და ამავე დროს, კადიროვს ჰყავს გაცილებით უფრო ძლიერი არმია, ვიდრე ჰყავდა ჯოხარ დუდაევს, როდესაც ჩეჩნეთი დე ფაქტო დამოუკიდებელ სახელმწიფოს წარმოადგენდა.

მეორე ვერსიით, შესაძლოა ეს შეთანხმების ნაწილი იყოს – „მე პოლიტიკურ ოპონენტებს მოგაშორებ, შენ ჩეჩნეთის ტერიტორიაზე ჩემი მმართველობის მიმართ ლოიალური იყავი “.

არსებობს მესამე ვერსიაც, შესაძლოა, საქართველოს სურდა იმის დემონსტრირება, რომ ის იცავს მათ შორის პოლიტიკური ოპონენტების სიცოცხლეს და ზრუნავს თითოეულ მოქალაქეზე. ამით სუს-მა  ქულები დაიწერა და გამოავლინა დამნაშავე. თუმცა, ეს ვერსია ყველაზე ნაკლებად იმსახურებს არსებობის უფლებას“, – ამბობს პოლიტოლოგი.

შეგახსენებთ, 15 ივნისს მთავარი არხის გენერალურმა დირექტორმა, ნიკა გვარამიამ გაავრცელა ინფორმაცია, რომ გიორგი გაბუნიას ლიკვიდაციას ჩეჩნეთის ლიდერი, რამზან კადიროვი გეგმავდა.

მისივე თქმით, გაბუნიას რამდენიმე თვის განმავლობაში უთვალთვალებდნენ, საქმის გამოძიება კი თავდაპირველად უკრაინაში დაიწყო.