პარტია „ლელო საქართველოსთვის“ ერთ-ერთი ლიდერი საბა ბუაძე პარლამენტში ინიცირებულ კანონპროექტს ეხმაურება, რომლის მიხედვით, პარტია, რომელიც მანდატებზე უარს იტყვის, საბიუჯეტო დაფინანსებასა და კანონით განსაზღვრულ რიგ პრივილეგიებს კარგავს:
„ქართული ოცნება“ აგრძელებს ევროპელი მედიატორების ჩართულობით მიღწეული შეთანხმების დარღვევის მცდელობებს. გუშინ, იურიდიულმა კომიტეტმა მხარი დაუჭირა 2020 წლის დეკემბერში ინიცირებულ კანონპროექტს, რომლის მიხედვითაც ბოიკოტში მყოფ პოლიტიკურ პარტიებს უწყდებათ საბიუჯეტო დაფინანსება. ეს ეწინააღმდეგება შარლ მიშელის დოკუმენტში არსებული პირდაპირ ჩანაწერს, რომლის მიხედვითაც მმართველ პარტიას უკან უნდა გაეწვია აღნიშნული კანონპროექტი.
„ოცნების“ ამ ინიციატივას უკვე მოჰყვა ვენეციის კომისიის უპრეცედენტოდ მწვავე შეფასება, რომლის მიხედვითაც კანონპროექტში არსებული ცვლილებები შეფასდა როგორც „გადაჭარბებული, არაპროპორციული და მეტისმეტად აგრესიული”. შეთანხმების ხელმოწერიდან მოკლე პერიოდში „ქართული ოცნება“ უკვე მერამდენედ ცდილობს შარლ მიშელის შეთანხმებით აღებული ვალდებულებების რევიზიას. ხელისუფლება იყენებს ყველა შესაძლებლობას რათა არ შეასრულოს ნაკისრი ვალდებულებები და მოახდინოს ისედაც მწვავე პოლიტიკური ვითარების კიდევ უფრო დაძაბვა.
ამნისტიის კანონის მიზნის და შინაარსის დამახინჯების და ჩვენი სტრატეგიული პარტნიორების ელჩების საჯარო მიმართვის მიუხედავად იუსტიციის უმაღლეს საბჭოში მოსამართლეთა კონფერენციის მიერ წევრების დანიშვნის გამართლების შემდეგ, მესამედ ხდება ევროპელი მედიატორების მონაწილეობით მიღწეული შეთანხმების საწინააღმდეგო ნაბიჯის გადადგმა, რაც პირდაპირ უთხრის ძირს ჩვენი ქვეყნის დასავლურ ინტეგრაციას და საქართველოში სტაბილური პოლიტიკური გარემოს ჩამოყალიბებას.
მოვუწოდებთ „ქართულ ოცნებას“ შეაჩეროს აღნიშნული კანონპროექტების განხილვა და მეტი პასუხისმგებლობით მოეკიდოს მიშელის დოკუმენტით ნაკისრი ვალდებულებების შესრულებას“, – აღნიშნა საბა ბუაძემ.
