დღეს „ქართული ოცნების“ ბათუმის ორგანიზაციაში საგანგებო ბრიფინგი გაიმართა, რომელზეც შტაბის ხელმძღვანელმა გიორგი მანველიძემ „ერთიანი ნაციონალური მოძრაობა“ პროვოკაციის მოწყობაში დაადანაშაულა.
როგორც გიორგი მანველიძემ განაცხადა, ხულოს მუნიციპალიტეტის სოფელ დიდაჭარაში „ნაციონალური მოძრაობის“ აქტივისტები მმართველი პარტიის მაჟორიტარი დეპუტატობის კანდიდატის ანზორ ბოლქვაძის წინასაარჩევნო შეხვედრის ჩაშლას ცდილობდნენ, რის გამოც ანზორ ბოლქვაძემ ამომრჩევლებთან შეხვედრა შეწყვიტა.
„გუშინ დიდაჭარაში, ხულოს რაიონში, ქართული ოცნების მაჟორიტარობის კანდიდატებს წინასაარჩევნო შეხვრდრისას, ნაცმოძრაობის წარმომადგენლებმა მოუწყვეს პროვოკაცია, რომლის მიზანიც კონფლიქტის და ფიზიკური დაპირისპირების გამოწვევა იყო. ჩვენ, როგორც ხელისუფლებამ და პასუხისმგებლიანმა პოლიტიკურმა ძალამ, თავი ავარიდეთ კონფლიქტს და პროვოკაციას, რომელიც დაგეგმა „ნაციონალურმა მოძრაობამ“ და განახორციელეს მათმა წარმომადგენლებმა. მოვუწოდებთ სამართალდამცავებს, აღკვეთილ იქნეს მსგავსი შესაძლო პროვოკაციები, რაც ნაცმოძრაობის დღის წესრიგს წარმოადგენს“,-განაცხადა გიორგი მანველიძემ.
„ნაციონალურ მოძრაობაში“ მმართველ გუნდს წერილობით უპასუხეს.
„ანზორ ბოლქვაძე ცდილობდა ღორჯომში პარასკევის ლოცვაზე ასვლას და ხალხმა არ მიიღო, ასევე არ მიიღეს შუახევში კობალთაში, ხულოში, სოფელ წაბლანაში, დიდაჭარაში, წაბლიანში და სხვა სოფლებში. გამოდის რომ ათეულობით სოფელში არიან ნაციონალები და თუ ასე ფიქრობს ქართული ოცნება და მისი კანდიდატები, ეს იმას ნიშნავს, რომ მოსახლეობის უმეტესი ნაწილი ნაციონალია და არჩევნები წაგებული აქვთ“, -ნათქვამია „ერთიანი ნაციონალური მოძრაობის მიერ“ გაავრცელებულ განცხადებაში.
ავტორი: ნაირა ქობულაძე
