დღეს სალიბაურის ყოფილი ჩაის ფაბრიკის შენობაში მცხოვრებმა ათეულობით სოციალურად დაუცველმა ოჯახმა აქცია გამართა და ხელისუფლებას დახმარებისთვის კიდევ ერთხელ მიმართა.
როგორც სოციალურად დაუცველები ამბობენ, ხელისუფლებამ ისინი მოატყუა, რადგან 2020 წლის საპარლამენტო არჩევნების წინ მათ სოციალური პრობლემების მოგვარება და ფართების დაკანონება დაპირდა, თუმცა, როგორც კი არჩევნები დასრულდა, დაპირებები წარსულს ჩაბარდა.
მოსახლეობა დღეს უკვე ფიქრობს, რომ დაპირება იმთავითვე წინასაარჩევნო სიყალბე იყო.
„აქ თითქმის 60-მდე ოჯახი ცხოვრობს. არჩეევნებამდე დაგვპირდნენ, მოგვცემდნენ დაკანონების უფლებას. გარკვეული საბუთებიც მოგვთხოვეს ამისთვის. მაგრამ მერე ეს არ გახდა შესაძლებელი. აქ ცხოვრება შეუძლებელია. ყოველდღე საფრთხის ქვეშ ვართ. ყოველდღე საშიშროების მოლოდინში ვართ. ვითხოვთ, რომ შეამოწმონ რა მდგომარეობაში ვცხოვრობთ, რამდენად ვარგისია საცხოვრებლად ეს ფართები, გაგვასახლონ აქედან და მოგვცენ ალტერნატიული საცხოვრებელი ფართები”- აცხადებს აქციის ერთ-ერთი მონაწილე ია ბაჯაძე.
თუ ხელისუფლება 10 დღის განმავლობაში ხელისუფლება სათანადო ზომებს არ გაატარებს და ამ ადამიანების მოთხოვნებს არ დააკმაყოფილებს, მოსახლეობა აჭარის მთავრობის სახლთან პერმანენტულ აქციებს აანონსებს.
ავტორი: ნაირა ქობულაძე
