ცნობილი ხდება გიორგი შაქარაშვილის საქმის ერთ-ერთი ფიგურანტის ჩვენება, რომელსაც დაზარალებულის სტატუსი აქვს მინიჭებული.
ჩვენებაში იგი ამბობს, რომ მას უცნობი პირები გაურკვეველი საგნით გაუსწორდნენ და მთელი სახელი სისხლიანი ჰქონდა.
„მანქანა გაჩერდა ჩვენს წინ, საიდანაც გადმოვიდა 4 ჩემთვის უცნობი პიროვნება, რომელთაგან ერთ-ერთს, რომელიც იყო სრული აღნაგობის, ხელში ეჭირა რაღაც ჩემთვის უცნობი გრძელი საგანი, რომელიც მოუქნია კონსტანტინე ღიბრაძეს. მოხვდა თუ არა მოქნეული საგანი, არ მახსოვს, რადგან ამ დროს, მოულოდნელად, გონება დავკარგე. როდესაც გონებაზე მოვედი, ბუნდოვნად ვხედავდი, რომ წელში მოხრილი ბორძიკით მივდიოდი ხიდის მიმართულებით და უკნიდან რამდენიმე პიროვნება მირტყამდა თავში. მაგრამ მე ვერ ვხედავდი თუ რას მირტყამდნენ, მახსოვს, რომ მივუახლოვდი ხიდის მოაჯირს, სადაც იდო გრძელი რკინა. აღნიშნულ რკინას დავეყრდენი…
….დავინახე, რომ ხიდზე გამყოფ ზოლში იყო ბუჩქები, რის გამოც მე კვლავ გადავკვეთე გზის სავალი ნაწილი და დავიმალე გზის სავალ ნაწილებს შორის არსებულ ბუჩქებში და ვიყურებოდი თბილისის მიმართულებით მოძრავი სავალი ნაწილისკენ…
…მე ვიწექი ბუჩქებში ნიადაგზე და ვამოწმებდი ტანზე მქონდა თუ არა დაზიანებები. ან მქონდა თუ არა მიყენებული ჭრილობები, თუმცა ტანზე რაიმე დაზიანება ან ჭრილობა არ მქონდა. თუმცა, ყურიდან, წარბიდან და ცხვირიდან მომდიოდა სისხლი და მთელი სახე მქონდა სისხლში ამოსვრილი…“, – წერია ჩვენებაში, რომელსაც „რუსთავი 2“ ასაჯაროებს.
დღეს გიორგი შაქარაშვილის საქმეზე მცხეთის პოლიციის სამმართველოში გამოკითხვები განახლდა.
დილიდან მცხეთის პოლიციის განყოფილებაში იმყოფებოდნენ პირები, რომლებსაც ამ საქმესთან შემხებლობა აქვთ.
შეგახსენებთ, 19 წლის ფეხბურთელ გიორგი შაქარაშვილის გარდაცვალების საქმეზე სამართალდამცველებმა 17 პირი დააკავეს.
საქმეზე გამოძიება საქართველოს სსკ-ის 225-ე, 143-ე და 126-ე მუხლებით გრძელდება, რაც ძალადობის, ჯგუფური ძალადობის ორგანიზებისა და თავისუფლების უკანონო აღკვეთის მუხლებს გულისხმობს.
