„ყველაფერს გავაკეთებთ, რომ პროექტის მიმართ ნდობა შეიქმნას და დღეს, აუცილებლად ვისაუბრებ იმაზე, თუ რამდენად მნიშვნელოვანია ადგილობრივი ჰიდრო რესურსის განვითარება საქართველოსთვის იმისთვის, რომ საქართველოს მზარდი ეკონომიკა იმპორტზე არ იყოს დამოკიდებული და დამოუკიდებელი და ძლიერი ეროვნული ეკონომიკა გვქონდეს“,- ამის შესახებ ეკონომიკის მინისტრმა ჟურნალისტებთან საუბრისას განაცხადა.
დღეს ნათია თურნავასა და ლევან დავითაშვილს პარლამენში უსმენენ.
„პრემიერ-მინისტრის დავალებით, მე და ლევან დავითაშვილს დაწყებული გვაქვს ძალიან აქტიური კომუნიკაცია ადგილობრივ მოსახლეობასთან და ზოგადად ფართო საზოგადოებასთან, ექსპერტებთან. შევხვდით ცაგერის მუნიციპალიტეტის მცხოვრებლებს, ასევე ჩავედით უშუალოდ ხეობაში და საპროტესტო აქციის მონაწილეებს შევხვდით.
დღეს აქ გვექნება საგნობრივი დისკუსია, ამ დისკუსიას კვლავაც ღია ფორმატში გავაგრძელებთ. ჩვენი ამოცანაა, რომ პირველ რიგში ადგილობრივი მოსახლეობის საკითხები და პრობლემები უკეთ გადაწყდეს „ნამახვანიჰესის“ პროექტის ფარგლებში და ამ თვალსაზრისით საკმაოდ საინტერესო წინადადებებს ვამზადებთ, რომელიც გამოიხატება პროექტის მომზადებასა და ზედამხედველობაში უფრო ფართო ჩართულობით, როგორც დამოუკიდებელი ექსპერტების, ასევე ადგილობრივი მოსახლეობის“,-აღნიშნა თურნავამ.
