ქობულეთში საოჯახო სასტუმროების მფლობელები საბანკო დავალიანების გადავადებისა და საპროცენტო განაკვეთის სრული სუბსიდირების მოთხოვნით აქციას მართავენ.
აქციის მონაწილეებმა ბათუმი-ქობულეთის დამაკავშირებელი გზა ჩოლოქის მონაკვეთზე გადაკეტეს.
ისინი მთავრობის თავმჯდომარე თორნიკე რიჟვაძესთან შეხვედრას ითხოვენ.
როგორც აქციის მონაწილეები აცხადებენ, ორშაბათს აქციას მთავრობის სახლთან გამართავენ და არ შეწყვეტენ საპროტესტო გამოსვლებს, სანამ ხელისუფლება მათ დასახმარებლად ქმედით ნაბიჯებს არ გადადგამს.
„პანდემიის დროს დავზარალდით, სესხებს ვერ ვიხდით. ქუჩაში ვრჩებით ამდენი ადამიანი. ჩემ სასტუმროში დამსვენებელს ვირუსი დაუდასტურდა. კარანტინში გაგვიშვეს ყველა. სასტუმრო დაიკეტა. დამსვენებლები ისე წავიდნენ, თანხაც არ გადამიხადეს. ძალიან დავზარალდი.იცოდა ბანკმა ეს ყველაფერი, ჩავაყენე საქმის კურსში და მაინც თანხის გადახდას მთხოვენ. საიდან გადავიხადო? მე სხვა შემოსავალი არაფერი არ მაქვს. ქუჩაში ვრჩებით ბავშვებით. ვითხოვთ, დაგვეხმაროს მთავრობა, გვიშუამდგომლონ ბანკთან. დღემდე მხოლოდ დაპირებები გვესმის”- აცხადებს აქციის ერთ-ერთი მონაწილე.
ადგილზე სამართალდამცავები არიან მობილიზებული.
ავტორი: ნაირა ქობულაძე
