ქობულეთში საოჯახო ტიპის სასტუმროს მეპატრონეებმა ბანკის სესხების გადავადებისა და სახელმწიფოსგან დახმარების მოთხოვნით აქცია გამართეს. აქციის მონაწილეებმა რამდენიმე წუთით აღმაშენებელის ქუჩა გადაკეტეს.
ისინი ხელისუფლების წარმომადგენლებთან შეხვედრას ითხოვდნენ. აქციის მონაწილეებს აჭარის ფინანსთა და ეკონომიკის მინისტრი ჯაბა ფუტკარაძე შეხვდა. მან მოქალაქეებს უთხრა, რომ ისინი მარტო არ არიან, ხელისუფლება ყველანაირად ცდილობს მათი პრობლემების მოგვარებას და ორშაბათს საბანკო ორგანიზაციის წარმომადგენლებთან დაგეგმილი შეხვედრის მიზანი სწორედ ამ საკითხის მოგვარებაა.
„სახელმწიფო არც ერთ თქვენგანს და არც ერთ ჩვენ მოქალაქეს, მით უმეტეს ასეთ რთულ ვითარებაში, არ მიატოვებს. ყველანაირად დაგიდგებით გვერდით, ეს არის ყველაზე მთავარი საკითხი. მინდა ყველამ იცოდეს და ყველამ გაიგოს. მთავარი მესიჯი არის, რაც მინდა იცოდეთ, რომ მარტო არ ხართ. ყველა დონეზე ინფირმირებულია ხელისუფლება, ჩართულია როგორც ადგილობრივი მუნიციპალიტეტი, ასევე აჭარის მთავრობა და რა თქმა უნდა, ცენტრალურ დონეზე არიან ინფორმირებული. ცენტრალური ხელისუფლების მხარდაჭერის გარეშე, რა თქმა უნდა, რთული იქნება ნებისმიერი საკითხის მოგვარება. ასეთ რთულ ვითარებაში, ისედაც ყველა დაძაბულია, ყველა ნერვიულობთ, მესმის, მაგრამ მინდა ერთი მთავარი რამ ვთქვა, რაც თქვენც და ჩვენც ყველას დაგვეხმარება, არავითარ შემთხვევაში არ გავხდეთ ვიღაცის ინტერესების მსხვერპლი”-განაცხადა აქციის მონაწილეებთან შეხვედრისას აჭარის ფინანსთა და ეკონომიკის მინისტრმა ჯაბა ფუტკარაძემ.
ავტორი: ნაირა ქობულაძე
