ქობულეთში საოჯახო სასტუმროების მფლობელებმა ბანკების საპროცენტო გადასახადის ერთი წლით გადავადების მოთხოვნით აქცია გამართეს.
როგორც აქციის მონაწილეები აცხადებენ, წელს ტურისტული სეზონი პანდემის გამო ჩავარდა და ისინი თანხის გადახდას ვერ შეძლებენ.
„კარგად ხედავთ, რომ ტურისტული სეზონი წელს ჩავარდა. არ არიან ტურისტები, რომლებზეც დამოკიდებული ვართ. გვაქვს ბანკის ვალი, ვერ შევძლებთ გადახდას. ამიტომ მოვითხოვთ რომ ერთი წლით ბანკებმა სესხი გადაგვივადონ, ასევე პროცენტი ჩამოგვაჭრან. რისთვისაც შუამდგონლობას ქობულეთის მერიას ვთხოვთ. წინააღმდეგ შემთხვევაში, არ გავჩერდებით და პერმანენტულად გავმართავთ აქციებს”- განაცხადა აქციის ერთ-ერთმა მონაწილემ.
აქციის მონაწილეებმა მერიის წინ მდებარე სკვერში კანცელარიაში შესატანად ხელმოწერები შეაგროვეს. როგორც პრაიმტაიმს ქობულეთის მერიაში განუცხადეს, ინდივიდუალურად მოხდება მოქალაქეების პრობლემის განხილვა და შესაბამისი გადაწყვეტილების მიღება, რაზეც ერთიანად მუშაობს როგორც ადგილობრივი თვითმმართველობის გუნდი, ასევე აჭარის მთავრობა.
„დღეს ისევ შედგა შეხვედრა სეზონურ მსესხებლებთან, ქობულეთის მოსახლეობასთან. ეს არის ადამიანები, რომლებსაც ფაქტობრივად ტურისტული სეზონის პრობლემების გამო აქვთ პრობლემა ვადამოსული საკრედიტო დავალიანებების გასტუმრების. შესაბამისად, აღნიშნულთან დაკავშირებით ერთიანად მუშაობს, როგორც ადგილობრივი თვითმმართველობის გუნდი, ასევე აჭარის ავტონომიური რესპუბლიკის მთავრობა, ფინანსთა და ეკონომიკის სამინისტრო და მაქსიმუმს აკეთებენ იმისათვის, რომ ამ მოქალაქეების მოთხოვნა იქნას გათვალისწინებული და მაქსიმალურად იქნას შემსუბუქებული ის პრობლემა, რომელიც სწორედ პანდემიური პერიოდის შედეგად ტურისტულ სეზონს მიადგა ქობულეთში. ყველაზე მნიშვნელოვანი არის ის რომ სწორად, მართებულად, ეფექტურად იქნას გადაჭრილი ეს პრობლემა. ამისთვის საჭირო არის შესაბამისი საინფორმაციო ბაზის შედგენა ინდივიდუალურად. შესაბამისად, ამ საინფორმაციო ბაზის მიხედვით, ინდივიდუალურად მოხდება თითოელი პრობლემის განხილვა და შესაბამისი გადაწყვეყვეტილების მიღება, რომელიც უნდა იყოს ჩვენი მოქალაქეების საკეთილდღეოდ“, – აცხადებენ ქობულეთის მერიაში.
ავტორი: ნაირა ქობულაძე
