ქუთაისში მცხოვრები ახალდაქორწინებული წყვილები, რომელთაგან ერთს მაინც აქვს სოციალურად დაუცველის სტატუსი, მერიისგან 500 ლარს მიიღებენ.

სარეიტინგო ქულების შესაბამისობის გარდა, საჭიროა წყვილი რეგისტრირებული იყოს ქუთაისში და მათი ფაქტობრივი საცხოვრებელი ადგილიც ქუთაისი იყოს. ამისთვის, მერიამ ბიუჯეტში 5 000 ლარი გამოყო.

„ახალდაქორწინებული ოჯახების შექმნის წახალისება“ – ასე ჰქვია ახალ პროგრამას, რომელიც ახალშექმნილი ოჯახების ერთჯერადად მხარდაჭერას გულისხმობს, თუმცა, თუ ბიუჯეტში ამ მიზნით გამოყოფილი თანხის რაოდენობით ვიმსჯელებთ, 500 ლარის მიღებას მხოლოდ 10 წყვილი შეძლებს.

იმისთვის, რომ წყვილმა თანხა მიიღოს, საჭიროა ქორწინებიდან არაუგვიანეს 30 დღისა წერილობით მიმართოს ქალაქის მერს. განცხადებას თან უნდა ერთვოდეს წყვილის პირადობის მოწმობები, ქორწინების მოწმობა და საბანკო რეკვიზიტები.

პროგრამა უკვე გათვალისწინებულია 2021 წლის ბიუჯეტში, რომელიც საკრებულომ 30 დეკემბერს დაამტკიცა.

ავტორი: კესო მოლაშხია