„თავისივე გადაგდებული, რეზერვის – რეზერვში გადანახული კანდიდატები და ყველა დროის ხელისუფლებას მორგებული მდიდარი ბიზნესმენები, რომლებიც კარგად „აიასნებენ“ მთავრობასთან და არასოდეს დგანან ხალხის გვერდით – აი ეს დავინახე „ქართული ოცნების“ დღევანდელ პრეზენტაციაზე“, – ასე აფასებს პოლიტიკური მოძრაობა „ტრიბუნას“ ლიდერი, დავით ჭიჭინაძე “ქართული ოცნების” მაჟორიტარ კანდიდატებს.
„დღეს დაანონსებული ე.წ. „თამამი დაპირებებიც“ კი ვერ მოვისმინეთ, სამაგიეროდ ნათლად ვიხილეთ 2012 წლის გაცოცხლების მცდელობა.
მაგრამ 2012 წლის მერე ერთი ათწლეული გავიდა. მმართველი პარტია კი, იმის მაგივრად, რომ საქართველოს სახელმწიფო წინ წაეყვანა, გამუდმებით წარსულთან ბრძოლაშია ჩართული. იმიტომ ჰქონდათ დღესაც წარსულთან შეხვედრა.
მაგრამ მათ ავიწყდებათ, რომ პოლიტიკური ძალა მომავალზე უნდა იყოს ორიენტირებული და არა წარსულში იქექოს.
თუმცა ახალს ვინ დარდობს, ძველი დაპირებები მაინც შეესრულებინათ!
მაგალითად – იაფი ფული და წესრიგი საბანკო სექტორში- ესეც 2012 წლის უმთავრესი დაპირება იყო. დღეს კი გვაქვს ძალინ ძვირი ფული და უკონტროლო საბანკო სექტორი, რამაც კიდევ უფრო დაანგრია ჩვენი ქვეყანა და გააღატაკა ხალხი. არადა ხალხს სჭირდება ღირსეული ცხოვრება, ღირსეული შემოსავალი და არა ათეული წლების განმავლობაში ერთი და იგივე მდიდარი ბიზნესმენების ყურება, რომლებიც ყოველთვის მოქმედი ხელისუფლების მხარეს არიან და არა ხალხის! პანდემიით სიამაყეც მართლა სამარცხვინოა, რაც ისევ ხალხის კეთილგონიერებით დავძლიეთ და არა ჯანდაცვის სისტემით.
მოკლედ, დღეს „ქართულმა ოცნებამ“ თავისივე გადაგდებული, რეზერვის – რეზერვში გადანახული კანდიდატები წარადგინა, რესურსი აღარ გააჩნია და იმიტომ.
და ისევ ბიზნესმენები, მთავრობასთან კარგად „გამაიასნებელი“ ფულიანი ხალხი, ვინც ყოველთვის ხელისუფლების გვერდით დგას და არა ხალხის!
რაც ნიშნავს იმას, რომ „ქართული ოცნება“ ისევ მდიდარ ხალხზეა ორიენტირებული და არა იმ ადამიანებზე, ვინც ამ ქვეყანაში ყველა არჩევნებს იგებს“ – განაცხადა დავით ჭიჭინაძემ.
ცნობისთვის, დღეს „ქართულმა ოცნებამ“ მაჟორიტარ კანდიდატთა ვინაობა დაასახელა.
„ქართულმა ოცნებამ” მაჟორიტარი დეპუტატობის კანდიდატები წარადგინა
