პირველად, მეცხრე მოწვევის პარლამენტი 2016 წლის 18 ნოემბერს ქუთაისში შეიკრიბა. ახალმა კანონმდებლებმა ფიცი დადეს. „ქართული ოცნებიდან“ პარლამენტის რიგებში, 115 დეპუტატი მოხვდა, 27 „ნაციონალური მოძრაობიდან“, 6 „პატრიოტთა ალიანსიდან“ და ერთი დამოუკიდებელი დეპუტატი – სალომე ზურაბიშვილი, რომელიც დღეს ქვეყნის პრეზიდენტია.

გიორგი მარგველაშვილის წლიური მოხსენება

ქუთაისის პარლამენტში 2018 წლის 2 მაისს, ყველაზე გამორჩეული და ხმაურიანი პრეზიდენტ გიორგი მარგველაშვილის ვიზიტი იყო. პრეზიდენტმა პროტესტის ნიშნად სხდომა დატოვა. გიორგი მარგველაშვილი ითხოვდა, რომ დეპუტატების სიტყვით გამოსვლისას მასაც მისცემოდა პასუხის გაცემის საშუალება. პარლამენტის თავმჯდომარემ, ირაკლი კობახიძემ კი მას განუმარტა, რომ რეგლამენტის მიხედვით, ყველა კითხვაზე პასუხის შესაძლებლობა საბოლოო სიტყვით გამოსვლისას ექნებოდა.

2019 წელს პარალმენტი სრულად დედაქალაქში გადავიდა.

უვადო მოსამართლეთა შესარჩევი გასაუბრებები პარლამენტში

ყველაზე ხმაურიანი პროცესები მოსამართლეების დანიშვნის საკითხს ახლდა.

პარლამენტში მოსამართლეობის კანდიდატების მოსმენის ხანგრძლივი პროცესი მიმდინარეობდა. 14 მათგანი მოსამართლედ აირჩიეს. მათ შორის, მაშინდელი პროკურორი შალვა თადუმაძე. სწორედ მისი დიპლომის ნამდვილობა იყო იმ დროის, ყველაზე აქტუალური და საკამათო საკითხი.

ფრაქცია „ნაციონალური მოძრაობის“ თავმჯდომარემ რომან გოცირიძემ თადუმაძის თანაკურსელებისთვის კონკურსი გამოაცხადა. თუ რომელიმე თანაკურსელის არსებობა დადასტურდებოდა, გოცირიძე მას ხინკლებით გაუმასპინძლდებოდა, თუმცა მას ხინკლების მიტანა პარლამენტში მოუწია.

შეიცვალა უზენაეს სასამართლოში მოსამართლეების გამწესების წესიც. ეკა ბესელიამ, რომელიც მუდმივად მოსამართლეების კლანის გავლენებზე საუბრობდა, საკითხის გამო უმრავლესობა დატოვა.

სერგეი გავრილოვის ვიზიტი საქართველოს პარლამენტში

2019 წელს საქართველომ მართლმადიდებლობის საპარლამენტთაშორისო გენერალური ასამბლეის რიგით 26-ე სესიას უმასპინძლა. ღონისძიების ფარგლებში, პარლამენტის შენობაში სხდომას რუსეთის სახელმწიფო დუმის დეპუტატი სერგეი გავრილოვი უძღვებოდა, რომელიც პარლამენტის თავმჯდომარის სკამზე იჯდა. ფაქტმა საზოგადოებასა და ოპოზიციაში აღშფოთება გამოიწვია.

ოპოზიციის წარმომადგენლებმა სხდომათა დარბაზიდან გავრილოვი გააძევეს, ქვეყანა კი საპროტესტი ტალღამ მოიცვა.

ამ პროცესების შემდეგ, ირაკლი კობახიძემ პარლამენტის თავმჯდომარის პოსტი დატოვა, მისი ადგილი კი არჩილ თალაკვაძემ დაიკავა.

„ქართული ოცნების“ თავმჯდომარე ბიძინა ივანიშვილი მოსახლეობას სრულად პროპორციულ არჩევნებს დაპირდა.

საკონსტიტუციო ცვლილებები ჩავარდა

ე.წ. ამბოხებული მაჟორიტარების ძალისხმევით ცვლილებების პროექტი ჩავარდა.

პროპორციულ საარჩევნო სისტემაზე გადასვლის საკითხმა ხმების საკმარისი რაოდენობა (113) ვერ მოაგროვა.

მიუხედავად იმისა, რომ ცვლილებებს გაცხადებულად მხარს უჭერდა მმართველი გუნდიც და ოპოზიციაც, საკითხი ე.წ. ამბოხებულმა მაჟორიტარებმა ჩააგდეს.

პროპორციული საარჩევნო სისტემის კანონპროექტს ხმა არ მისცა „ქართული ოცნების“ 35-მა დეპუტატმა, თუმცა კანონპროექტის ინიციატორი თავად მმართველი გუნდი იყო. ინიციატივას სულ 101-მა დეპუტატმა დაუჭირა მხარი.

                   პარლამენტის პიკეტირების სერია

ოპოზიცია ირწმუნებოდა, რომ დაპირების მიუხედავად, ხელისუფლებას ცვლილებების ჩაგდება წინასწარ ჰქონდა დაგეგმილი. ამისთვის, კი მათ მაჟორიტარები გამოიყენეს. კენჭისყრიდან რამდენიმე წუთში, მმართველი გუნდი რამდენიმე ლიდერმა, მათ შორის პარლამენტის ვიცე-სპიკერმა, თამარ ჩუგოშვილმა დატოვა.

რუსთაველის გამზირი კი პროტესტმა კიდევ ერთხელ მოიცვა. იყო პარლამენტის პიკეტირება, ყოველდღიური აქციები და ქუჩაში სპეცრაზმის გამოყვანა, მანამ სანამ პროცესებში საერთაშორისო პარტნიორები არ ჩაერთვნენ.

120/30 

8 მარტს, ოპოზიციასა და ხელისუფლებას შორის შეთანხმება შედგა.  კონსესუსი ორ საკითხზე შედგა და შესაბამისად, ორი მემორანდუმი გაფორმდა.

მემორანდუმი პირველი – არჩევნები 120:30-ზე პროპორციით უნდა გაიმართოს.

პარლამენტი 120 პროპორციული და 30 მაჟორიტარული მანდატით დაკომპლექტდება, ხოლო საარჩევნო ოლქები სამართლიანად გადანაწილდება.

2020 წლის საპარლამენტო არჩევნებში მინიმალური ბარიერი 1% იქნება. ამასთან ერთად, დაწესდება 40%-იანი ჩამკეტი მექანიზმი, რაც გულისხმობს, რომ თუ პარტია 40%-ზე ნაკლებ მხარდაჭერას მიიღებს, ის უმრავლესობას ვერ დააკომპლექტებს.

მემორანდუმი მეორე – მართლმსაჯულების სისტემაში უმაღლესი სტანდარტების დაცვა.

პროცესმა საკანონმდებლო ორგანოში გადაინაცვლა. სხდომებს ბოიკოტი გამოუცხადა ოპოზიციამ, თუმცა საბოლოოდ, „ევროპულმა საქართველომ“ პირველ მოსმენასა და კენჭისყრაში მონაწილეობა მიიღო, რადგან მათი თქმით, ცვლილებები „დააზღვია“.

საკანონმდებლო ცვლილებები სამი მოსმენით დამტკიცდა, 2020 წლის საპარლამენტო არჩევნები 120/30-ზე პროპორციით გაიმართება, რითიც საქართელოს მოსახლეობა მეათე მოწვევის პარლამენტს დააკომპლექტებს.