გარემოს ეროვნული სააგენტოს მონიტორინგისა და პროგნოზირების ცენტრის მოკლევადიანი პროგნოზების სამმართველოს უფროსის დოდო გვაზავას ინფორმაციით, უახლოეს რამდენიმე დღეში ამინდი საქართველოში საგრძნობლად არ შეიცვლება.

როგორც ის „პრაიმტაიმთან“ საუბრისას აცხადებს, 17 ნოემბრის საღამოდან უნდა ველოდოთ ამიერკავკასიის ჩრდილოეთიდან, ცივი ქარების გააქტიურებას.

„18-19 ნოემბრის ჩათვლით, მთაში და მაღალმთიან რეგიონებში მოსალოდნელია თოვლი. ამასთანავე, ტემპერატურაც დაიკლებს საქართველოს დაბლობ ნაწილშიც.

განსხვავებით აღმოსავლეთ საქართველოს რეგიონებიდან, დასავლეთ საქართველოში, მიმდინარე დღეების განმავლობაში ჰაერის ტემპერატურა 19-20 გრადუსს გაუტოლდება. იმის გამო, რომ დასავლეთში ზღვა ჰაერის მასებს შედარებით ათბობს, ტემპერატურული კონტრასტი დასავლეთსა და აღმოსავლეთ საქართველოს რეგიონებს შორის შეიმჩნევა. აქ, აღმოსავლეთ საქართველოსთან შედარებით, კოლხეთის დაბლობი და სანაპირო ზოლის დანარჩენი რეგიონები განსაკუთრებით თბილი იქნება. 17-19 ნოემბრის ჩათვლით, დღის ტემპერატურა 10-12 გრადუსამდე დაეცემა, ხოლო ღამით – 6 გრადუსამდე იქნება შემცირებული.

რაც შეეხება აღმოსავლეთ საქართველოს, თბილისსა და კახეთში, ამ დროისათვის, მაქსიმალური ტემპერატურა 10-12 გრადუსებს შორის მერყეობს. 18, 19 და 20 ნოემბრისათვის, ტემპერატურის კიდევ, უფრო მეტად დაკლებაამოსალოდნელი, რასაც აღმოსავლეთიდან ცივი ჰაერის მასების შემოსვლა განაპირობებს. ამ რეგიონებში, დღის მაქსიამლური ტემპერატურა შესაძლებელია 8-10 გრადუსს, ხოლო ღამით – 1-3 გრადუსს მიუახლოვდეს.

21 ნოემბრიდან, მთელი საქართველოს დაბლობებსა და ბარებში დღის ტემპერატურის რამდენიმე გრადუსით მომატებაა ნავარაუდევი,“- განგვიცხადა დოდო გვაზავამ.

ავტორი: ამუკა ქორიძე