ონლაინ არხის, Nexta-ს ყოფილი რედაქტორის, ჟურნალისტის რომან პროტასევიჩის მამა, დიმიტრი პროტასევიჩი სოციალურ ქსელში გავრცელებულ ვიდეოს ეხმაურება, რომელშიც რომანი ბელარუსის ხელისუფლების მიერ წაყენებულ ბრალდებებს აღიარებს. ინფორმაციას ამის შესახებ BBC-ი ავრცელებს.
რომან პროტასევიჩის მამა მიიჩნევს, რომ მისი შვილი აიძულეს დანაშაული ეღიარებინა.
„ვფიქრობ, ის აიძულეს დანაშაული ეღიარებინა. ეს არ არის მისი სიტყვები, ეს არ არის მისი მეტყველების ინტონაცია. ის ძალიან თავშეკავებულად მოქმედებს და ხედავთ, რომ ნერვიულობს. მას, სავარაუდოდ, ცხვირი გატეხილი აქვს და სახე პუდრით აქვს დაფარული“, – განაცხადა დიმიტრი პროტასევიჩმა.
დიმიტრი პროტასევიჩი ირწმუნება, რომ არ შეიძლებოდა რომანს მასობრივი არეულობების მოწყობა ეღიარებინა, ვინაიდან მას მსგავსი რამ არ ჩაუდენია. მისი თქმით, ის, რაც მის შვილთან დაკავშირებთ ხდება, „სრული სიგიჟეა“.
„იმედი გვაქვს ამ ყველაფერს გაუმკლავდება. იმაზე ფიქრისაც კი გვეშინია, რომ ის აწამეს და სცემეს. შოკირებულები და გაბრაზებულები ვართ. ასეთი რამ 21 საუკუნის ევროპაში არ უნდა მომხდარიყო. იმედი მაქვს, ევროკავშირი და საერთაშორისო საზოგადოება სათანადო რეაგირებას მოახდენს და ბელარუსის ხელისუფლება მიხვდება, რომ დიდი შეცდომა დაუშვა.
შეგახსენებთ, რომ გუშინ სოციალურ ქსელში ბელარუსი დისიდენტი ჟურნალისტის, რომან პროტასევიჩის ვიდეო გავრცელდა, სადაც ის საუბრობს, რომ მის ჯანმრთელობას საფრთხე არ ემუქრება.
გავრცელებულ ვიდეოში, დაკავებული ჟურნალისტი ასევე აცხადებს, რომ თანამშრომლობს გამოძიებასთან და აძლევს აღიარებით ჩვენებას მინსკში მასობრივი არეულობების ორგანიზებასთან დაკავშირებით.
რა ვიცით 26 წლის ჟურნალისტზე, რომელიც ლუკაშენკოს რეჟიმმა თვითფრინავიდან გაიტაცა – მიმოხილვა
