საქართველოში აშშ-ს ელჩი, კელი დეგნანი აცხადებს, რომ რუსეთისთვის რთულია ჰყავდეს ისეთი მეზობელი, რომლის ისტორიაც წარმატებულია.
მისივე შეფასებით, სწორედ ეს არის რუსეთის მცდელობების მიზეზი, ძირი გამოუთხაროს საქართველოს მიერ მიღწეულ პროგრესს.
„ამერიკის შეერთებული შტატები საქართველოსთან მრავალი სხვადასხვა მიმართულებით 30 წელზე მეტია, თანამშრომლობს. ამ დროის განმავლობაში, რაც ვნახეთ არის ის, რომ საზოგადოების ცნობიერება რუსეთის დესტაბილიზაციური როლის შესახებ იზრდება. რუსეთისთვის რთულია, ჰყავდეს ისეთი მეზობელი, რომლის ისტორიაც წარმატებულია. ვფიქრობ, სწორედ ეს არის მთავარი მიზეზის იმისა, რატომ ვხედავთ ასეთ მცდელობებს, რომ ძირი გამოუთხაროს საქართველოს მიერ მიღწეულ პროგრესს“, – განაცხადა ელჩმა.
დეგნანი ამბობს, რომ საქართველომ მნიშვნელოვან პროგრესს მიაღწია.
„იმ დროის განმავლობაში, რაც მე აქ ვიმყოფები, ძალიან კონსტრუქციულად ვმუშაობთ ამ მთავრობასთან, ისევე, როგორც წინა მთავრობებთან. პროგრესი არის ნათელი, საქართველომ მიაღწია მნიშვნელოვან პროგრესს – ჯანდაცვა, განათლება, უსაფრთხოება, ეკონომიკა, დემოკრატიული განვითარება, ეს ნამდვილად არის წარმატება“,- განაცხადა ელჩმა.
