საქართველოში აშშ-ის ელჩის, კელი დეგნანის თქმით, შესაძლოა, რუსეთმა საქართველოსთან მიმართებით დეზინფორმაციის კამპანიის გაგრძელება სცადოს. ამის შესახებ დეგნანმა ჟურნალისტებთან საუბრისას განაცხადა.
მისივე თქმით, საქართველოს მთავრობა ამ საკითხს სერიოზულად ეკიდება.
„რა თქმა უნდა, ყველა ყურადღებით აკვირდება მიმდინარე პროცესებს, რადგან მაღალი მოლოდინი არსებობს.
რაც შეეხება დეზინფორმაციის თემას, ჩვენ რუსეთისგან გვინახავს ასეთი ტიპის საზიანო ქმედებები სხვადასხვა ქვეყნის არჩევნებში, ევროპასა და ასევე, აშშ-ში. შესაბამისად, ალბათ, არის იმის შესაძლებლობა, რომ იგივე გააგრძელოს საქართველოში.
ვფიქრობ, რომ საქართველოს მთავრობა ამ საკითხს სერიოზულად უდგება და ასევე საზოგადოებაც.
ძალიან მნიშვნელოვანია არასწორ ინფორმაციაზე სწორი რეაგირება და იმ საკითხისადმი სიფრთხილე, რაც ქვეყნის საზიანოდ არის მიმართული“, – განაცხადა კელი დეგნანმა.
