ექსპერტი გია ხუხაშვილი შინაგან საქმეთა მინისტრის მოადგილე კახა საბანაძის გადადგომას გამოეხმაურა.
„სხვა ასპექტებს და თეორიებს თავი რომ დავანებოთ, საბანაძის გადადგომაში მნიშვნელოვანია მოტივი, ის სტანდარტი, როგორც უნდა მოქმედებდეს ნებისმიერი ჩინოვნიკი. წინასწარ გიპასუხებთ სავარაუდო კითხვაზე – ღარიბაშვილს არ შერცხვება“, – წერს ხუხაშვილი სოციალურ ქსელში.
ცნობისთვის, შინაგან საქმეთა მინისტრის მოადგილემ, კახა საბანაძემ გადადგომის შესახებ ინფორმაცია სოციალური ქსელის მეშვეობით გაავრცელა.
„მსურს, გამოვეხმაურო ბოლო პერიოდში მედიაში გასულ სიუჟეტებს და ხაზგასმით აღვნიშნო, რომ წლების განმავლობაში ვემსახურებოდი სახელმწიფოს და ვიცავდი კანონს, რომლის ზედმიწევნით აღსრულებაც იყო, არის და იქნება ჩემთვის უპირველესი.
ვფიქრობ, რომ ზემოხსენებულ ფაქტებს სჭირდება შესწავლა, შესაბამისად უნდა ჩატარდეს სრულყოფილი და ობიექტური გამოძიება, რომელიც დაადგენს სიმართლეს.
აღნიშნულიდან გამომდინარე, საგამოძიებო პროცესის მიმართ ნდობის უზრუნველყოფის მიზნით, ვტოვებ თანამდებობას! ვფიქრობ, ეს იქნება პრეცედენტი ყველა თანამდებობის პირისათვის, საზოგადოებაში ობიექტურად გაჩენილი კითხვების შემთხვევაში იმოქმედოს პასუხისმგებლობის მაღალი სტანდარტით.
მადლობა მინდა გადავუხადო ყველა ღირსეულ პოლიციელს, ვისთან ერთადაც წლების განმავლობაში ვიმუშავე. სისტემაში მუშაობენ გმირები, რომელთა მხრებზეც დგას ჩვენი ქვეყნის უსაფრთხოება, მინდა წარმატება ვუსურვო მათ სამშობლოს სამსახურში“, – აღნიშნა კახა საბანაძემ განცხადებაში.
