თერჯოლაში გარდაცვლილი 11 წლის მოზარდის დედის დასახმარებლად საქართველოს საგარეო საქმეთა სამინისტრო სრულ მზადყოფნას გამოთქვამს.
როგორც უწყებაში „პრაიმტაიმნიუსს“ განუმარტეს, ქალს საზღვრების გადაკვეთის წესები დარღვეული აქვს, შესაბამისად ეს საქმეს უფრო ართულებს.
„საბერძნეთში საქართველოს საკონსულო სამსახური კავშირზეა გარდაცვლილი მცირეწლოვანის დედასთან, რომელიც ამ დროისთვის იმყოფება საბერძნეთის რესპუბლიკის ტერიტორიაზე.
საგარეო საქმეთა სამინისტრო გამოთქვამს მზადყოფნას დაეხმაროს ქალბატონს ქვეყანაში გამომგზვარების პროცესში, რაც თავის მხრივ, დაკავშირებულია რთულ პროცედურასთან გამომდინარე იქიდან, რომ მას დარღვეული აქვს საბერძნეთის რესპუბლიკაში ყოფნის, ისევე როგორც თავის დროზე თურქეთ-საბერძნეთის საზღვრის გადაკვეთის წესები.
უწყება აქტიურად არის ჩართული აღნიშნული ქალბატონის დაბრუნების პროცესში, ასევე საქართველოს მთავრობა უზრუნველყოფს მისი საქართველოში ჩამოსვლისას PCR ტესტირებას“, – აცხადებენ სამინისტროში.
