სახალხო დამცველი ნინოწმინდის ბავშვთა პანსიონში ჩავიდა. ამ წუთებში ნინო ლომჯარია და მეუფე იაკობი პანსიონში იმყოფებიან.
ნინო ლომჯარიამ განაცხადა, რომ პანსიონში შესვლა დაგვიანებულია. პანსიონის კარი პირველად მედიისთვის დღეს გაიღო.
„
„მაქვს მოლოდინი, რომ მოგვეცემა სრულყოფილად გავეცნოთ მიმდინარე პროცესებს და ასევე, ინფრასტრუქტურულ მდგომარეობას. ჩამოვედი აპარატის რამდენიმე თანამშრომელთან ერთად, რომლებიც მუშაობენ ბავშვთა უფლებების მიმართულებით, ასევე გვახლავს ბავშვთა ფსიქოლოგი, რომ თუ ბავშვებს ექნებათ სურვილი, გავესაუბროთ. ვაპირებთ, რომ გავესაუბროთ. პირველ რიგში შეხვედრა გვექნება პანსიონის ხელმძღვანელობასთან, მეუფე იაკობთან და შემდეგ ასევე ვაპირებთ, რომ ვნახოთ, რა პროცესები მიმდინარეობს ბავშვების საჭიროებების შეფასებებთან დაკავშირებით და რას აკეთებენ სოცმუშაკები. ვიცი, რომ რამდენიმე აღსაზრდელის გადაყვანა კიდევ იგეგმება ალტერნატიურ ზრუნვაში და მნიშვნელოვანია, რომ პანსიონში დარჩენილ ბავშვებთან დაკავშირებითაც ძალიან მალე იქნას გადაწყვეტილებები მიღებული.
მიმაჩნია, რომ ამ კედლებში, ამ სივრცეში და იმ აღმზრდელების პირობებში ბავშვები თავისუფლად ვერ გამოხატავენ საკუთარ ნებას, ამიტომ ძალიან მნიშვნელოვანია, რომ ეს ბავშვები გადაყვანილები იყვნენ ალტერნატიულ ზრუნვაში. ვფიქრობ, რომ მაინც მიმდინარეობს მათ მიმართ გარკვეული ტიპის ზეწოლა იმ აღმზრდელების პირობებში, რომლებთანაც ისინი წლებია ცხოვრობენ და რომლებსაც არ უნდათ, რომ ამ ბავშვებმა ეს კედლები დატოვონ. ამიტომ, ძალიან მნიშვნელოვანია მათთან გასაუბრება. თუ საჭიროებას დავინახავთ, განმეორებითაც გავესაუბრებით, ან ვფიქრობ, რომ ფსიქოლოგი და სპეციალისტები ისედაც ნათლად დაინახავენ რა მდგომარეობაა“,- განაცხადა ნინო ლომჯარიამ.
სავარაუდოდ, შეხვედრა რამდენიმე საათს გაგრძელდება, რის შემდეგაც ნინო ლომჯარია პანსიონში არსებულ მდგომარეობაზე ისაუბრებს.
ნინოწმინდის პანსიონთან დაკავშირებით, ბოდბელ მთავარეპისკოპოს იაკობსა და სახალხო დამცველს შორის შეხვედრა პირველად 17 ივნისს გაიმართა.
