ძალიან მძიმე მოსასმენი და სანახავია ის ბოლშევიკური კამპანია, რომელსაც ვხედავთ „ნაცმოძრაობის“ კუთვნილი 3 ტელეკომპანიის შესრულებით. ეს არის კამპანია სახელმწიფოს და ეკლესიის წინააღმდეგ. რა თქმა უნდა, ამ მძიმე ბოლშევიკურ კამპანიას საზოგადოების მხრიდან უნდა გაეცეს სათანადო პასუხი, განსაკუთრებით 2 ოქტომბერს, როდესაც ჩვენი ამომრჩეველი მივა საარჩევნო ყუთებთან, – ამის შესახებ „ქართული ოცნების“ თავმჯდომარემ, ირაკლი კობახიძემ განაცხადა.
მისივე თქმით, კიდევ უფრო მძიმე მოსასმენი იყო „ნაცმოძრაობიდან“ გამოჟონილი ინფორმაცია იმასთან დაკავშირებით, რომ ეს ბოლშევიკური კამპანია წარმოადგენს ფონის შემზადებას პირადი ცხოვრების ამსახველი ჩანაწერების გავრცელებისთვის.
„ამ ბოლშევიკურ, გარყვნილ ქმედებებს სათანადო პასუხი უნდა გაეცეს. ჩვენ ჩავატარეთ ბრიფინგი ამ თემაზე და ამის შემდეგ ამ პარტიული ტელევიზიების ორმა წარმომადგენელმა – ნიკა გვარამიამ და დიანა ტრაპაიძემ – გაავრცელეს განცხადებები, სადაც კიდევ ერთხელ ადასტურებენ, რომ საქმის კურსში არიან იმ ჩანაწერთან დაკავშირებით, რომელიც უნდა გაავრცელოს „ნაცმოძრაობამ“, და ამით ისინი იქმნიან ერთგვარ ალიბის. ეს მათ არ გაუვათ – საზოგადოება მათ გასცემს სათანადო პასუხს. მხოლოდ ბოლშევიკებს შეიძლება მოუვიდეთ აზრად ისეთი ჩანაწერის გავრცელება, რომელზეც ისინი საუბრობენ. გზავნილები, რომელიც მოვისმინეთ გვარამიას და ტრაპაიძის მხრიდან, პირდაპირ მიანიშნებს, რომ 2 გარყვნილ ადამიანს აქვს ინფორმაცია ყველაფერზე, რაც დაგეგმილი აქვს „ნაცმოძრაობას“, – განაცხადა კობახიძემ.
