„ტრადიციული“ და „თანამედროვე“ საკეტები
ტექნოლოგიურმა განვითარებამ სახლის უსაფრთხოების სისტემებიც დახვეწა. თუმცა, სიგნალიზაციისა და კამერების დაყენებამდე, პრიორიტეტული ყველაზე მარტივი – კარის სათანადო საკეტის არჩევაა.
ტრადიციული საკეტის მექანიზმი გასაღების ჩასმისა და „დაკბილული“ კიდეების სწორი მიმართულებით მობრუნებას გულისხმობს. თანამედროვე საკეტის ამოქმედება კი გასაღების შეხების გარეშეც არის შესაძლებელი.
ელექტრო საკეტები შეიძლება რამდენიმე გზით გააქტიურდეს. მაგალითად, სასტუმროებში ხშირად გვინახავს ბარათი, რომელიც აღებს კონკრეტული ოთახის კარს. ელექტრო საკეტიანი კარის გასაღებად დისტანციურ მართვის სენსორს ან პინ-კოდსაც იყენებენ.
საკეტების დადებითი და უარყოფითი მხარეები
კარის საკეტების არჩევისას უნდა გავითვალისწინოთ, რომ ორივე, ტრადიციულ და ელექტრონულ, მექანიზმს აქვს დადებითი და უარყოფითი მხარეები. გასაღებს, ბარათებსა და კარის პულტებს ადამიანები ხშირად კარგავენ. ასევე მარტივად ავიწყდებათ საკეტის კოდი. ამასთან, თანამედროვე საკეტი პრობლემური ხდება მაშინ, როცა ელექტროენერგია ჩაიჭრება. ამ დროს კარი შეიძლება ღია ან ჩაკეტილი დარჩეს.
თუ კარი ჩაიკეტა, გასაღები დაიკარგა ან პულტი აღარ მუშაობს, ყველაზე კარგი გამოსავალი კოდის გამოყენება იქნებოდა. დავიწყების შემთხვევაშიც კი, პინის შეცვლა მარტივად და სწრაფად არის შესაძლებელი, მაშინ, როცა გასაღებისა და ბარათის თავიდან დამზადებას მეტი დრო მიაქვს. ამიტომ, ზოგჯერ შესაძლოა გადავაწყდეთ კარს, რომლის გაღებაც არა მხოლოდ გასაღებით ან პაროლით, არამედ ორივე, ელექტრონული და ტრადიციული, მექანიზმის კომბინაციით არის შესაძლებელი. მაგალითად, ზოგჯერ მეტი უსაფრთხოებისთვის და გაუთვალისწინებელი შემთხვევებისგან თავის არიდებისთვის, ელექტრო საკეტებთან ერთად, სათადარიგო გასაღებიც აქვთ.
საკეტის მოდერნიზების შესაძლებლობები
თუ ფიქრობთ, რომ „დაკბილული“ საკეტის მაგივრად, ან მასთან ერთად, დროა გამოიყენოთ ელექტრო საკეტი, რამდენიმე შესაძლებლობას შემოგთავაზებთ:
- ქართულ ბაზარზე ყველაზე ეკონომიური არის ელექტრო-მაგნიტური საკეტი. მაგნიტური მოწყობილობა ელექტრომაგნიტისა და არმატურის ფირფიტებისგან კეთდება და უსაფრთხოების ორ შესაძლებლობას გვთავაზობს: თუ ელექტროენერგია არ მიეწოდება, მაგნიტური საკეტი ავტომატურად იკეტება ან პირიქით, მაშინვე იღება.
- ასევე ხელმისაწვდომია საკეტები, რომელიც ერგება ხის, მინის, მეტალის და პლასტმასის კარებსაც. ამ მექანიზმის გაღება სწორედ ელექტრონული და ფიზიკური გასაღების კომბინაციით არის შესაძლებელი. ფასი 120 ლარიდან 300 ლარის ფარგლებში მერყეობს.
კარის საკეტის დასაყენებლად საჭიროა ძველი საკეტი ამოიღოთ და ახალი მოდელით ჩაანაცვლოთ. ამისთვის შესაძლოა ზეინკალი დაგჭირდეთ ან საკეტი, ინსტრუქციის მიხედვით, თავად შეცვალოთ. კარის საკეტის სწორი კონფიგურაცია იცავს შესასვლელებს და უზრუნველყოფს, რომ სახლი ხელმისაწვდომი იყოს მხოლოდ მისი მაცხოვრებლებისთვის, მაგრამ უცხოებისთვის – ჩაკეტილი. კარის საკეტები მოიცავს მექანიზმებს კარის სახელურებისთვის, სამაგრებისთვის და ასევე შეიძლება გვთავაზობდეს ფუნქციებს, როგორიცაა გასაღების გარეშე შესვლა, Wi-Fi კავშირი ან სენსორულად მართვის მოწყობილობები.
უსაფრთხოების პროფესიონალები გირჩევენ, რომ უბრალო, ტრადიციულ, „დაკბილულ-პირიან“ გასაღებს არ დასჯერდეთ და უსაფრთხოებისთვის უფრო თანამედროვე ზომებს მიმართოთ.
