თუ ვინმეს ილუზია ჰქონდა, რომ მიშელი გაემგზავრებოდა საქართველოდან და დაივიწყებდა ამ ფორმატს, რომელიც მისი ინიცირებული იყო, გამოცდილი შვედი დიპლომატის დანიშვნამ ან პოსტზე, ვფიქრობ, ნათელი გახადა, რომ ევროკავშირმა სტრატეგიული მნიშვნელობა მიანიჭა საქართველოში პოლიტიკური კრიზისის დარეგულირებას, – ამის შესახებ „ნაციონალური მოძრაობის“ წევრმა სალომე სამადაშვილმა განაცხადა.
მისი თქმით, შარლ მიშელის წარმომადგენელი საქართველოში იმ მისიით ჩამოდის, რომ დებატებში კი არ ჩაერთოს, არამედ პოლიტიკურ მხარეებს შორის შეთანხმებას მიაღწიოს.
„ვფიქრობ, ევროპარლამენტარები საქართველოში შექმნილ ვითარებასთან დაკავშირებით დღეს ძალიან ბევრ რამეს იტყვიან, ასე რომ, დებატებს დაველოდოთ და შემდეგ გავაკეთოთ შეფასებები“, – განაცხადა სამადაშვილმა.
სალომე სამადაშვილმა ჟურნალისტებთან დიალოგთან დაკავშირებითაც ისაუბრა. ის იმედოვნებს, რომ ყველა საკითხი, რომელიც პოლიტიკური დღის წესრიგისთვის მნიშვნელოვანია, განხილვისა და შეთანხმების საგანი გახდება.
„ველოდებით, რომ პატივს სცემენ იმ შეთანხმებას, რომელსაც ბატონი მიშელის აქ ყოფნის დროს მივაღწიეთ და ყველა ის საკითხი, რომელიც მნიშვნელოვანია პოლიტიკური დღის წესრიგისთვის, რაცაა პოლიტპატიმრების გათავისუფლება და ვადამდელი არჩევნები იქნება, განხილვის და შეთანხმების თემა. დრო იწურება „ქართული ოცნებისთვის“, რადგან პრემიერ-მინისტრს ძალიან გასაგებად უთხრეს ჩვენმა ევროპელმა კოლეგებმა, რომ 16-ში ევროკავშირი-საქართველოს თანამშრომლობის საბჭოზე ელოდებიან, რომ პრემიერი ჩავა შეთანხმებული სამოქმედო გეგმით. ასე რომ, „ქართულ ოცნებაზეა“ დამოკიდებული. სამწუხაროდ, ჩვენ ვერაფერს ვიზამთ, რომ შეთანხმება შედგეს“, – აღნიშნა სალომე სამადაშვილმა.
ცნობისთვის, ევროპული საბჭოს პრეზიდენტი შარლ მიშელი საქართველოში პირად წარმომადგენელს აგზავნის, რომელიც ევროკავშირის მიერ მხარდაჭერილ პოლიტიკურ დიალოგში ჩაერთვება.
