სამეგრელოში ლურჯი მოცვის კრეფა აქტიურ ფაზაშია. ლურჯი მოცვის გაშენება საქართველოში სულ უფრო პოპულარული ხდება. სამეგრელო კი ამ მიმართულებით ბოლო რამდენიმე წელია სერიოზულ ნაბიჯებს დგამს. მხოლოდ ზუგდიდის რაიონში ლურჯი მოცვის პლანტაციების საერთო ფართობი უკვე 120 ჰექტარს აჭარბებს.
აგრარულ მეცნიერებათა დოქტორი, ტრენერი დემეტრე ლიპარტია ამბობს, რომ ლურჯ მოცვზე მოთხოვნაა როგორც ადგილობრივ, ასევე, საერთაშორისო ბაზრებზე და ფასებიც საკმაოდ მაღალია.
მისი განმარტებით, ლურჯი მოცვი ქვეყანაში უცხოური ვალუტის შემოდინების ერთ-ერთ მნიშვნელოვანი წყაროც შეიძლება, გახდეს.
მისი გაშენება საკმაოდ ფინანსურ ძალებს მოითხოვს, თუმცა მიღებული მოგებაც სოლიდურია.
ქართველი ფერმერები პროდუქციის ევროკავშირის ბაზარზე გატანას გეგმავდნენ, თუმცა ეს წელს პანდემიის გამო ვერ ხერხდება. ფერმერ ჯენერ ბელქანიას ზუგდიდის მუნიციპალიტეტ სოფელ დავითიანში 10 ჰექტარზე აქვს მოცვის პლანტაცია.
იგი ჯერჯერობით არ აკონკრეტებს, თუ რამდენ მოსავალს ელოდება ამ სეზონზე და სად გაიტანს პროდუქციას.
„10 ჰექტარზე მაქვს მოსავლიანი ფართობი,ხოლო 5 ჰექტარზე კიდევ გავაშენე და მოსავალს შემდეგ წლებში ველოდები .ძირითადად ადგილობრივ ბაზარზე ვყიდი პროდუქციას და უცხოელებზე.ფასი კი ხარისხის მიხედვით 12 ლარიდან 18 ლარამდე მერყეობს. ვკრეფთ და ვასაწყობებთ, შარშან ამის პრობლემა არ იყო გასაღების, ევროპაშიც გავიტანეთ, აი წელს ვნახოთ“, – განაცხადა ჯენერ ბელქანიამ.
ზუგდიდის „აგრო სახლის“ დირექტორი მაია მიქავა „პრაიმტაიმთან“ ამბობს, რომ სამეგრელოდან მოცვი ამ სეზონზე ლარსის გამშვები პუნქტიდან, მოსკოვში გავა.
„დაგვრჩა მოცვისთვის რუსეთის ბაზრის მოცვა,პანდემიის გამო ევროპის ქვეყნებში ვერ გაგვაქვს პროდუქცია. პირადად მე მაქვს შეკვეთა მოსკოვიდან და 60 ტონა მოცვი ლარსის გამშვები პუნქტიდან გავა სამეგრელოდან.ფასი ადგილზე 5-დან-6დოლარამდე მერყეობს“,- ამბობს მიქავა.
ავტორი: თეა შონია
