საქართველოს მორაგბეთა ნაკრები ირლანდიასთან 23:10 დამარცხდა. 8 ერის მესამე ტურის მატჩში საქართველოს მორაგბეთა ეროვნული ნაკრები, „ავივა სთედიუმზე” ადგილობრივ ირლანდიას შეხვდა და დაძაბულ ბრძოლაში, 13 ქულის სხვაობით, 23:10 დამარცხდა. პირველი ტაიმი ქართველმა მორაგეებმა 20:7 წააგეს.
ბორჯღალოსნების მხრიდან თავი მე-16 წუთზე გიორგი კვესელაძემ გამოიჩინა, რომელმაც მეტოქის ნახევარზე ლელოს დადება მოახერხა, გარდასახვა კი თედო აბჟანდაძემ ზუსტად შეასრულა. პირველივე ტაიმში, ბორჯღალოსნებმა საპასუხოდ ორი ლელო მიიღეს.
მატჩის მეორე ნახევარი ტოლსწორად წარიმართა და გუნდებმა ერთმანეთის წინააღმდეგ მხოლოდ თითო-თითო საჯარიმოს გატანა მოახერხეს. საბოლოოდ, ტაიმი 3:3 მორჩა, ძირითადი დროის ანგარიში კი 23:10 დაფიქსირდა.
