საქართველოსა და ნორვეგიას შორის ეკონომიკურ და თავდაცვის სფეროებში თანამშრომლობა იყო მთავარი თემა საქართველოს პრემიერ-მინისტრ გიორგი გახარიასა და ნორვეგიის სამეფოს ელჩს, ელენე სანდ ანდრესენს შორის გამართულ შეხვედრაზე. ინფორმაციას მთავრობის ადმინისტრაცია ავრცელებს.
„ხაზი გაესვა ეკონომიკური თანამშრომლობის კუთხით არსებული პოტენციალის სრულად ათვისების მნიშვნელობას. აღინიშნა, რომ საქართველოსა და EFTA-ს შორის თავისუფალი ვაჭრობის ხელშეკრულება საქართველო-ნორვეგიის ორმხრივი ეკონომიკური ურთიერთობების გაღრმავებისთვის კიდევ უფრო მეტ შესაძლებლობებს იძლევა.
აღინიშნა, რომ ორმხრივი ურთიერთობების განვითარებას, მათ შორის ტურიზმის სფეროში, ისევე, როგორც ბიზნესკავშირების გაღრმავებას ხელს შეუწყობს საქართველოსა და ნორვეგიას შორის პირდაპირი ფრენები დაწყება, განსაკუთრებით „კოვიდ-19“-ის გლობალური პანდემიით გამოწვეული სირთულეების დასაძლევად“, – ნათქვამია ინფორმაციაში.
