უცხოეთში ქართული წარმოების პირბადეების ექსპორტი დაიწყო. როგორც ეკონომიკისა და მდგრადი განვითარების მინისტრმა, ნათია თურნავამ ჟურნალისტებთან საუბრისას განაცხადა, კერძო კომპანიების მიერ პოლიპროპილენისგან წარმოებული პირბადეები ექსპორტზე ევროპულ ქვეყნებსა და ამერიკის შეერთებულ შტატებში გავიდა.
„საქართველოში წარმოებული სამედიცინო დანიშნულების პირბადეები, რომლებსაც კერძო კომპანიები აწარმოებენ, გავიდა ექსპორტზე. მოგეხსენებათ, პირბადეები იწარმოება სახელმწიფო პროგრამის ფარგლებშიც და ასევე, კერძო კომპანიების მიერ.
დღეს ჩვენ შეგვიძლია ვთქვათ, რომ ადრე იმპორტიორი ქვეყანა ვიყავით, ახლა კი პირბადეების ექსპორტიორი ქვეყანა ვართ. ევროპულ ქვეყნებში, უკრაინაში, ასევე ამერიკის შეერთებულ შტატებში გავიდა ექსპორტზე, მანამდე ჩვენ ვკრძალავდით, რადგან ვუყურებდით, რომ შიდა ბაზარი გაჯერებულიყო“, – განაცხადა ნათია თურნავამ.
რაც შეეხება დოლბანდის 12-შრიან პირბადეებს, მინისტრის ინფორმაციით ამ დროისთვის, 5 მილიონამდე პირბადეა წარმოებული და სააფთიაქო ქსელები მარაგდება.
მისივე თქმით აღნიშნული პირბადეების ექსპორტი, რომელიც მოსახლეობას სუბსიდირებულ ფასად მიეწოდება, არ განიხილება.
