ნიკა მელიას გათავისუფლება პოლიტიკურ პროცესებზე მნიშვნელოვან გავლენას მოახდენს, – ამის შესახებ „სტრატეგია აღმაშენებლის” წევრმა, სერგო ჩიხლაძემ განაცხადა.
მისი თქმით, „ნაციონალური მოძრაობის” წევრებმა შეთანხმების დოკუმენტს ხელი უნდა მოაწერონ და პარლამენტში იყვნენ.
„რა თქმა უნდა, ნიკა მელიას გათავისუფლება პოლიტიკურ პროცესებზე მნიშვნელოვან გავლენას მოახდენს იქედან გამომდინარე, რომ „ნაციონალურ მოძრაობას“ ძალიან მნიშვნელოვანი გადაწყვეტილება აქვს მისაღები ხელშეკრულებაზე, პარლამენტში შესვლასთან დაკავშირებით, ეს მათი შიდა პოლიტიკური გადაწყვეტილება იქნება, თუმცა, ჩვენი აზრით, სწორი იქნება, თუ „ნაციონალური მოძრაობა“ პარლამენტში იქნება, ეს საკანონმდებლო ორგანოს კიდევ უფრო გააძლიერებს. რაც მეტი პარლამენტარი და ოპოზიციური ხმა იქნება პარლამენტში, მით მეტი საშუალება გვექნება მთლიანად ოპოზიციას, ვაიძულოთ „ქართულ ოცნებას“ თუნდაც ხელშეკრულების ბოლომდე შესრულება, ასევე უფრო ეფექტურად გამოვიყენოთ ის ბერკეტები, რაც შარლ მიშელის დოკუმენტით მოგვეცა პოლიტიკურ ძალებს ოქტომბრის არჩევნებამდე მისასვლელად. ამიტომ, ამ მხრივ ველოდებით „ნაციონალური მოძრაობის“ გადაწყვეტილებას, ჩემი სუბიექტური აზრია, რომ მათ დოკუმენტს ხელი უნდა მოაწერონ და პარლამენტში იყვნენ“ , -განაცხადა ჩიხლაძემ.
