ფეხბურთელ გიორგი შაქარაშვილის საქმეში ერთ-ერთი ბრალდებულის, ნიკოლოზ ცუცქირიძის ადვოკატი, არჩილ ბერიანიძე ამბობს, რომ ბრალდების მხარეს გამამტყუნებელი განაჩენის გამოცხადებისთვის საკმარისი მტკიცებულებები არ ჰქონია. ადვოკატის თქმით, გადაწყვეტილებას აუცილებლად გაასაჩივრებს.
„აბსოლუტურად მოულოდნელი იყო აღნიშნული გადაწყვეტილება ყველა დამცველისთვის, მათ შორის ბრალდებულებისთვის. შესაბამისად წარმოდგენა არ მაქვს რით შეიძლება დაასაბუთოს საკუთარ განაჩენში აღნიშული მცხეთის რაიონული სასამართლოს მოსამართლემ.
საქმის დაწყების დღიდან ჩვენ ვიძახდით, რომ მტკიცებულება საქმეში არ არის. ყოველ სასამართლოზე დასტურდებოდა, რომ ბრალდების მხარეს არ შეეძლო ნიკოლოზ ცუცქირიძისთვის წარმოედგინა მტკიცებულება. არ ველოდებოდით გამამტყუნებელ განაჩენს.
რა თქმა უნდა, გავასაჩივრებთ გადაწყვეტილებას. ეს გადაწყვეტილება ზოგადად საფრთხეს უქმნის მთლიანად სისხლის სამართლის პოლიტიკას მომავალში“,- განაცხადა არჩილ ბერიანიძემ.
ცნობისთვის, ფეხბურთელ გიორგი შაქარაშვილის საქმეზე დაკავებული პირები – ზ.ხ., აკაკი ქვრივიშვილი, ნიკოლოზ ცუცქირიძე, ლაშა შერმადინი, გიორგი მერაბიშვილი და ნიკოლოზ ქანაშვილი, მცხეთის რაიონულმა სასამართლომ დამნაშავედ ცნო.
