„ქართული ოცნება-დემოკრატიული საქართველოს“ საბურთალოს მაჟორიტარი დეპუტატობის კანდიდატი, დავით სერგეენკო ამბობს, „ქართულ ოცნებაში“ დარჩენის გადაწყვეტილება ჯერ კიდევ გასულ წელს მიიღო.
მისი თქმით, ძირითადად, კონსულტაციებს პრემიერ-მინისტრთან გადიოდა.
“მე თავდაპირველად მინისტრობიდან წამოსვლის პირველი თვეების განმავლობაში მქონდა ესეთი ხედვა, რომ მონაწილეობას მივიღებდი აუცილებლად წინასაარჩევნო პროცესებში, მაშინ არ იყო დადასტურებული პროპორციული თუ მაჟორიტარული სიით, რადგანაც თავისთავად, ეს მოდელი არ იყო დაზუსტებული.
რაც შეეხება კონკრეტულ უბანს და კონკრეტულ მაჟორიტარებს, ბოლო კვირების განმავლობაში უკვე დაზუსტებულია.
ის, რომ მე „ქართული ოცნების“ პოლიტიკურ გუნდში დავრჩებოდი, ჯერ კიდევ შარშან მივიღე ეს გადაწყვეტილება და ამას თავისი მყარი საფუძველი ჰქონდა, რომელიც შემიძლია ახლავე ვთქვა, რომ მე არ მეგულება არც ერთი პოლიტიკური ძალა და მთავრობა, რომელმაც ასეთ მაღალ პრიორიტეტზე აწია საქართველოში ჯანდაცვა და ამხელა მნიშვნელობა მიანიჭა მას, რამაც მოგვცა უამრავი შესაძლებლობა“, – ამბობს სერგეენკო „რუსთავი 2-ის“ ეთერში.
