“შეკრებისა და მანიფესტაციის თავისუფლება საქართველოში დაცულია, თუმცა კანონის დარღვევას შესაბამისი პასუხი მოჰყვება. მაგალითად, სახელმწიფო უწყებების შესასვლელების ბლოკირება აკრძალულია და შესაბამისად ამას კანონისმიერი პასუხი მოჰყვება”, – ამის შესახებ საპარლამენტო უმრავლესობის წევრმა, სოზარ სუბარმა „ქრონიკის“ პირდაპირ ეთერში განაცხადა.
„ავტომაგისტრალების, ცენტრალური მაგისტრალების, რკინიგზის გადაკეტვა არის კანონის დარღვევა და ამას მოჰყვება პასუხი. გზის გადაკეტვა, თუ ამის აუცილებლობა არ არსებობს, არ არის შესაბამისი ხალხმრავლობა და ხუთი დღით ადრე არ არის გაფრთხილება გაკეთებული, ასევე არ ჯდება კანონში. ასეთ დროს სახელმწიფო მაინც იჩენს უფრო ლიბერალურ დამოკიდებულებას, ვიდრე ამას კანონი მოითხოვს, მაგრამ საბოლოოდ მაინც კანონი უნდა შესრულდეს. ცხრა წელიწადია ვისმენთ, რომ რევოლუციას მოაწყობენ, 9 წელია ცდილობენ აჯანჯღარონ ქვეყანა, თუმცა მთელი მათი რევოლუციური მუხტი რამდენიმე ასეული აქტივისტით იწყება ხოლმე და რამდენიმე ათეულ კაცამდე ჩამოდის.
ახლა გადავიდნენ შემდეგ ტაქტიკაზე, რომ ვერ ვავნებთ სახელმწიფოს, სამაგიეროდ შევუქმნათ მაქსიმალური დისკომფორტი მოსახლეობას, რომ ხალხმა ბოლოს და ბოლოს ხელისუფლებას დაუწყოს ლანძღვა, რატომ ვერ დაამყარა ხელისუფლებამ წესრიგიო, მაგრამ კანი თავის სიმაღლეზე დგას და პოლიცია ყველაფერს აკეთებს, რომ კანონი იყოს დაცული“, – განაცხადა სოზარ სუბარმა.
