ფეხბურთელ გიორგი შაქარაშვილის გარდაცვალების გარემოებას პოლიტიკის ექსპერტი გია ხუხაშვილის ეხმაურება.
ხუხაშვილი „პრაიმტაიმთან“ ვარაუდობს, რომ ამ საქმის გამო, შესაძლოა, გარკვეული პირების პასუხისმგებლობის საკითხი დღის წესრიგში დადგეს, რადგან ჩანს, რომ ეს საქმე, სავარაუდოდ, „იკერება“.
„გარდაიცავალა თუ არა ასფიქსიით შაქარაშვილი, ამის დადგენა გაკვეთისთანავე ვიზუალურად შეიძლებოდა. როდესაც ამ ხნის განმავლობაში ასეთი დაძაბულობა იყო, რატომ არ ითქვა ეს მიზეზი მეორე დღესვე?! რატომ დასჭირდა ამ მარტივი დასკვნის გამოქვეყნებას კვირები?! ეს არის ძალიან მძიმე კითხვები, რომელზეც ძალიან ბევრ ადამიანს პასუხების გაცემა მოუწევს და დიდი ეჭვი მაქვს, რომ ამ კითხვების გამო, შესაძლოა, ბევრი ციხეში აღმოჩნდეს.
ახლა უკვე ამ ყველაფერზე ახალი თეორია აშენდება, რადგან ვიღაც გამოთქვამს ეჭვს, რომ მიმდინარეობდა ზეწოლა ექსპერტიზაზე და მთელი ამდენი დრო დასჭირდა ექსპერტების იძულებას, რომ რაღაც დაეწერათ ისე, როგორც ვიღაცას უნდოდა და არ აესახათ ობიექტური რეალობა.
თუ დადგინდა, რომ რაღაც არ არის წესრიგში, შესაძლოა, დადგეს იმ პირის პასუხისმგებლობა, რომლებსაც არასწორი დოკუმენტი შექმნა და იმის, ვინც ექსპერტს არასწორი დოკუმენტის შექმნას აიძულებდა. ამ საქმეში კითხვები არსებობს.
შესაძლოა, ეს საქმე იკერება, ან ძალიან დიდ უტიფრობასთან გვაქვს საქმე. მე პროკურატურასთან არანაირი შენიშვნები არ მაქვს, მაგრამ ექსპერტთან მაქვს კითხვა – რატომ მისცა საზოგადოებას ასეთი პოლიტიკური დაპირისპირების და სპეკულაციის საფუძველი, როცა შეეძლოთ მეორე დღესვე ეთქვათ ადამიანი ასფიქსიით იყო დაღუპული, თუ არა“,- განაცხადა ხუხაშვილმა.
ინფორმაციისთვის, ფეხბურთელის, გიორგი შაქარაშვილის გარდაცვალების გარემოების დადგენასთან დაკავშირებით, მთავარმა პროკურატურამ ექსპერტიზის დასკვნა დღეს გამოაქვეყნა.
ავტორი: ეკატერინე ზარნაძე
