„ნაციონალური მოძრაობა“ და მისი სატელიტები, ცდილობენ საკუთარი სცენარით, ფაქტების მაქსიმალურად დამახინჯებით, სასურველის რეალობად გასაღებით, საზოგადოებას დაანახონ სურათი, რომ გიორგი შაქარაშვილის სიკვდილის მიზეზების დადგენა არის არა გამოძიების პრეროგატივა, არამედ მათ მიერ შეთავაზებული, ინტერპრეტირებული ვერსიის შესაბამისად მომხდარი რეალობა, – ამის შესახებ საპარლამენტო უმრავლესობის წევრი, დავით მათიკაშვილი „პრაიმტაიმნიუსთან“ საუბრისას აცხადებს.
„ეს არის კიდევ ერთი შემთხვევა და დასტური იმისა, თუ როგორ იყენებენ ცალკეული ოპოზიციური ძალები და მათი რუპორი ტელევიზიები – „ნაციონალური მოძრაობა“ და მასთან დაკავშირებული ე.წ მედიასაშუალებები ახალგაზრდა კაცის დაღუპვის ამბავს საკუთარი ვიწრო პოლიტიკური და პარტიული ინტერესების დასაცავად და იმისთვის, რომ საზოგადოება შეცდომაში შეიყვანონ და ტრაგედია გარკვეულ წარმოდგენად აქციონ, რაც პირდაპირ შეურაცხმყოფელია პირველ რიგში, დაღუპული გიორგი შაქარაშვილის მშობლებისთვის.
მშობლის მიერ გავრცელებულ განცხადებაში კარგად ჩანს ის ლეგიტიმური პროტესტი, რომელიც მათ გაუჩნდათ იმ ზღვა მაქინაციებისა და ინტერპრეტაციების მიმართ, რომელიც მოედინება ძირითადად, ტელეკომპანია „მთავარის“, „ტვ პირველისა“ და „ფორმულას“ ეთერებიდან, სადაც წინასაარჩევნო მარათონზე მყოფი პოლიტიკური პარტია, უკვე ნახევრადკრიმინალურ დაჯგუფებად ქცეული „ნაციონალური მოძრაობა“ და მისი სატელიტები, ცდილობენ საკუთარი სცენარით, ფაქტების მაქსიმალურად დამახინჯებით, სასურველის რეალობად გასაღებით, საზოგადოებას დაანახონ სურათი, რომ გიორგი შაქარაშვილის სიკვდილის მიზეზების დადგენა არის არა გამოძიების, არამედ სწორედ, მათ მიერ შეთავაზებული, ინტერპრეტირებული ვერსიის შესაბამისად მომხდარი რეალობა“, – ამბობს დეპუტატი.
დავით მათიკაშვილის განცხადებით, საარჩევნო მარათონზე მყოფი პოლიტიკური ძალები ცდილობენ, ეს ფაქტი გამოიყენონ და გირგვლიანის მკვლელობას დააკავშირონ.
„ჩვენ მოვისმინეთ ოჯახის წევრების მიმართვა სახალხო დამცველისადმი, სადაც პირდაპირაა თხოვნა, რომ დაიცვან გარდაცვლილი ახალგაზრდას ოჯახი იმ Fake-ნიუსებისგან, რომელიც მაქსიმალურად შეურაცხყოფს ოჯახს და ფაქტობრივად, ერთი მხრივ, გამოძიების ლოგიკურ და სწორ განვითარებას უშლის ხელს და მეორე მხრივ, შეუიარაღებელი თვალითაც ნათლად ჩანს, რომ საარჩევნო მარათონზე მყოფი პოლიტიკური ძალები ცდილობენ, ეს ფაქტი გამოიყენონ და გირგვლიანის მკვლელობას დააკავშირონ. მოახდინონ ამ ორ ფაქტს შორის ბმა და წარმოაჩინონ ისე, რომ ფაქტი, რომელიც ევროპის სასამართლომ პირდაპირ სახელმწიფო დაადანაშაულა როგორც ამ საზარელი მკვლელობის დამნაშავე და პირდაპირ წერია, რომ სტრასბურგის სასამართლო გაოგნებას ვერ მალავს, ისე შეხმატკბილებულად მოქმედებდნენ სახელმწიფო უწყებები, რომ დაემალათ მკვლელობის ფაქტი და დამნაშავეები არ დაესაჯათ, თითქოს ამ ორ ფაქტს შორის რაღაც ბმა არის და ამით ფაქტობრივად, საარჩევნოდ განწირული პოლიტიკური ძალა, რომლის რეიტინგიც თვითინ ამავე პოლიტიკური ძალის მიერ დაქირავებული ორგანიზაციების მიერ ძალიან დაბალ ნიშნულზე არის განსაზღვრული, სწორედ ეს ძალა ცდილობს, ტრაგიკული ფაქტით და ამით მანიპულირებით დაიწეროს ქულა ჩვენს საზოგადოებასა და ელექტორატში. ეს მაქსიმალურად ამორალური და ზღვარსაგასული, წითელ ხაზებს გადაცდენილი ქმედებაა“, – ამბობს მათიკაშვილი.
დეპუტატი მედიას მოუწოდებს, შეწყვიტონ დაზარალებული ოჯახის ბულინგი და ომბუდსმენს დროულ რეაგირებას სთხოვს.
„პირდაპირ მოვუწოდებ, როგორც სახალხო დამცველს, რომელიც ვალდებულია, მოახდინოს რეაგირება და დადგეს სწორედ დაჩაგრული და უფლებადარღვეული პირების უფლებების დასაცავად, ასევე მოვუწოდებ ამ ე.წ ტელევიზიებს, შეწყვიტონ ბულინგი, შეწყვიტონ Fake-ნიუსებით საზოგადოების მანიპულირების მცდელობა და გამოძიებას ადროვონ, დაწყებული რთული საგამოძიებო საქმე, იმისთვის, რომ ჭეშმარიტება დადგინდეს და მეორე მხრივ, დაისაჯონ პირები, რომელთაც ბრალი მიუძღვით გიორგი შაქარაშვილის სიკვდილში“, – ამბობს დავით მათიკაშვილი.
